قالالىق پوليتسيا دەپارتامەنتى، شىمكەنت قالاسى اكىمدىگىنىڭ ۇيىمداستىرۋىمەن «شىمكەنت – ەسىرتكىسىز قالا» ناۋقانىن وتكىزدى.
ءىس-شاراعا جالپى 2500-گە جۋىق ادام قاتىستى. ونىڭ ىشىندە پوليتسيا قىزمەتكەرلەرى، پروكۋراتۋرا، قالا جاستارى، اۋدان اكىمدىكتەرىنە قاراستى كوممۋنالدىق مەكەمە جۇمىسشىلارى، ناركولوگ-دارىگەرلەر، سپورتشىلار، ەرىكتىلەر مەن پارتيا وكىلدەرى دە بار.
«استانا» الاڭىندا ارنايى جينالعان قاتىسۋشىلارعا ءىس-شارانىڭ ماقساتى مەن ماڭىزدىلىعىن جەتكىزىلىپ، نۇسقامالار بەرىلدى.
شارا بارىسىندا ەسىرتكى جارنامالارىن انىقتاپ جويۋ بويىنشا جۇمىستار اتقارىلدى. كوشەارالىق، اۋلاارالىق قاراۋ جۇرگىزىلىپ، تۇرعىندارعا ەسىرتكى قىلمىستارىن جاساعانى ءۇشىن زاڭدى جاۋاپكەرشىلىكتى ەسكەرتۋ، ازاماتتاردى سالاۋاتتى ءومىر سالتىن ۇستانۋعا شاقىرۋ جانە ناشاقورلىقتىڭ الدىن الۋ بويىنشا تۇسىندىرمە جۇمىستارىن جۇرگىزدى.
ءىس-شارا قورىتىندىسىمەن 2332 گراففيتي بوياۋ تۇرىندەگى ەسىرتكى جارنامالارىنىڭ، ولاردىڭ ينتەرنەت جەلىسىندەگى سىلتەمەلەرىنىڭ اتاۋلارى جويىلدى.
اكتسيا بارىسىندا پوليتسيا قىزمەتكەرلەرى مەن بەلسەندى جاستاردىڭ قىراعىلىعىنىڭ ارقاسىندا ەسىرتكىنىڭ زاڭسىز اينالىمىنا قاتىستى قۇقىق بۇزۋشىلىقتار دا انىقتالدى.
ماسەلەن، قاراتاۋ جانە تۇران اۋداندارىن ارالاۋ جۇمىستارىن جۇرگىزۋ بارىسىندا جەرگىلىكتى تۇرعىنداردان ەسىرتكىگە ۇقساس زاتتار تابىلىپ، پوليتسيا قىزمەتكەرلەرىمەن تاركىلەنىپ الىندى.
سونىمەن قاتار، ءىس-شارادا ينتەرنەت-الاياقتىقتى ەسكەرتۋ ماقساتىندا ارنايى جادىنامالار تاراتىلدى. تۇرعىندارمەن كەرى بايلانىستى نىعايتىپ، قۇقىق بۇزۋشىلىقتىڭ كەز-كەلگەن تۇرىنە «نولدىك توزىمدىلىك» قاعيداسىن قالىپتاستىرۋ مەن قوعام اراسىندا ەسىرتكىگە قارسى تەرىس كوزقاراس ورناتۋ باعىتىندا جۇمىستار اتقارىلدى. پوليتسەيلەر قالا اۋماعىندا ەسىرتكىگە قارسى جۇمىستاردى وتكىزۋ مەن وعان ءتيىمدى توسقاۋىل قويۋ بويىنشا ءىس-شارالار تۇراقتى تۇردە جالعاساتىنىن جەتكىزدى.
