تولاسسىز جاۋعان جاڭبىر مەن قاتتى جەلدىڭ سالدارىنان پاۆلودار قالاسىنداعى 5 باعدارشام جۇمىس ىستەمەي تۇر ونىڭ ۇستىنە، شاتىر وپىرىلىپ، ەكى ادامنىڭ جاراقات العانى حابارلاندى. قازىر كوممۋنالدىق قىزمەت كورسەۋشىلەر قۇلاعان اعاشتاردان كوشەلەردى تازارتىپ، قالا سيقىن قالپىنا كەلتىرىپ جاتىر، دەپ حابارلايدى "ادىرنا" ۇلتتىق پورتالى.
«تۇرعىن ءۇي-كوممۋنالدىق شارۋاشىلىق ءبولىمىنىڭ مالىمەتىنشە، اۋا رايىنىڭ قولايسىزدىعىنا بايلانىستى قازىرگى تاڭدا پاۆلودار قالاسىندا 5 باعدارشام جۇمىس ىستەمەيدى. اپاتتى جويۋمەن 2 بريگادا اينالىسىپ جاتىر»، - دەپ حابارلادى جۋرناليستەرگە پاۆلودار قالاسى اكىمىنىڭ ءباسپاسوز قىزمەتى.
قۇلاعان اعاشتاردى جيناۋ جۇمىسىن 3 بريگادا مەن 3 مامانداندىرىلعان تەحنيكا جۇرگىزىپ جاتىر.
قالادا جاڭبىر سۋىن سورۋعا 10-نان استام ارنايى تەحنيكا جۇمىلدىرىلعان.
«سونىمەن قاتار، قازىرگى ۋاقىتتا 5 237 تۇتىنۋشى ەلەكتر قۋاتىنسىز قالدى: جەكە تۇلعالار - 4 986, زاڭدى تۇلعالار - 251»، - دەپ حابارلادى پاۆلودار اكىمدىگى.
قازاقپاراتتىڭ جازۋىنشا, سولتۇستىك (نازارباەۆ اۋدانى – لەرمونتوۆ – بۇقار جىراۋ – تورايعىروۆ كوشەلەرى), وڭتۇستىك (ۆورۋشين – تسيولكوۆسكي كوشەلەرى اۋدانى), ورتالىق (كاتاەۆ اۋدانى – شوكين – نازارباەۆ – تولستوي كوشەلەرى، تولستوي كوشەسى بويى – كىشى اينالما جولى), باتىس (راديوزاۋىت اۋىلىنىڭ اۋدانى) ستانسالاردا جارىق وشىرىلگەن.
قالا مەن قالا ماڭىنداعى زالالدى جويۋعا 19 ادام مەن 5 تەحنيكا جۇمىلدىرىلدى.
جىلۋ جانە سۋ جەلىلەرىندە اقاۋ بولعان جوق.
«پاۆلودار جىلۋ جەلىلەرى» جشس، «پاۆلودار-ۆودوكانال» جشس قالىپتى رەجيمدە جۇمىس ىستەپ تۇر.
"ادىرنا" ۇلتتىق پورتالى
