كەرەكۋ قالاسىندا نوسەرلەگەن جاڭبىر توگىپ ءوتىپ، قالانىڭ ينفراقۇرىلىمىنا زيان كەلتىرگەنى حابارلاندى. ەكى ورتادا زارداپ شەككەن تۇرعىندار بار، دەپ حابارلايدى "ادىرنا" ۇلتتىق پورتالى.
كەرەكۋدەگى تابيعاتتىڭ توسىن مىنەز تانىتۋى حاقىندا الەۋمەتتىك جەلى بەلسەندىسى ەسەنبەك ساناتۇلى حابارلادى:
- سەل بوپ جاۋعان جاڭبىرعا پاۆلودارداعى ارتۋر ساۋدا ءۇيىنىڭ قابىرعاسى مەن شاتىرى شىداس بەرمەي وپىرىلىپ ءتۇستى. ول جانىنداعى جازعى كافە مەن كوپتەگەن ماشينالاردى باسىپ قالعان. ادامدار زارداپ شەكتى. وقيعا ورنىندا جەدەل جاردەممەن قۇتقارۋشىلار جۇمىس ىستەپ جاتىر، - دەدى اۆتور.
باق-تىڭ حابارلاۋىنشا، 1971 جانە 1975 جىلى تۋعان ەر ادام ءۇيىندى استىندا قالعان. قول، اياقتارى سىنىپ، باستان زاقىم العان. ەكەۋى دە قالالىق اۋرۋحانانىڭ جان ساقتاۋ بولىمىنە جاتقىزىلدى.
ورايى كەلگەندە ايتا كەتەيىك، اۋا رايىن انىقتايتىن ماماندار قازاقستاننىڭ كوپ ايماقتارىندا كۇن كۇركىرەپ، جاۋىن-شاشىن بولاتىنىن ايتادى. كەشە قاتتى جاۋعان جاۋىن سالدارىنان الماتى وبلىسىنداعى جول شايىلىپ، كەي ايماقتاردا سەل ءجۇردى.
"ادىرنا" ۇلتتىق پورتالى
