بريۋسسەلدەگى ايگىلى راتۋشادا قازاقستان تاۋەلسىزدىگىنىڭ 35 جىلدىعى تويلاندى

148
Adyrna.kz Telegram
https://adyrna.kz/storage/uploads/tLuFRj1aZM3NCcl5KrGsaZea346ickAtbwhtIdgK.jpg

ەل تاۋەلسىزدىگىنىڭ 35 جىلدىعى قارساڭىندا بريۋسسەل قالاسىنىڭ جۇرەگىندە، يۋنەسكو-نىڭ بۇكىلالەمدىك مۇرالار تىزىمىنە ەنگەن، XIV عاسىردا سالىنعان ەڭ كورىكتى ءارى تاريحي ساۋلەت تۋىندىسى — ايگىلى گران-پلاس الاڭىنداعى قالالىق راتۋشادا قازاق ونەرىنىڭ مارتەبەسىن اسقاقتاتقان مادەني شارا ۇيىمداستىرىلدى. ەۋروپانىڭ تورىندە وتكەن بۇل تاريحي كەشكە  ەۋروپا حالقى مەن شەتەلدەگى وتانداستارىمىز قاتىستى.

ەۋروپالىق قاۋىمداستىق نازارىنا ۇسىنىلعان اۋقىمدى فەستيۆالدە قازاقتىڭ ۇلتتىق ونەرى مەن مادەنيەتىنىڭ قايتالانباس ۇلگىلەرى پاش ەتىلدى. اتالمىش سالتاناتتى كەشتە كورەرمەندەرگە ۇلتتىق رۋحتى اسقاقتاتقان «شىمكەنت كونتسەرت» كونتسەرتتىك ۇيىمىنىڭ ونەرپازدارى ەرەكشە باعدارلاما ۇسىندى. كەش شىرايىن كىرگىزگەن ۇجىمدار مەن ونەر يەلەرى:

• «قاعان» ەتنوفولكلورلىق ءانسامبلى — قازاقتىڭ كونە ءۇنى مەن زاماناۋي سارىنىن ۇيلەستىرىپ، جۇرەكتەردى تەبىرەنتتى;

• «ياسسى» بي ءانسامبلى — ۇلتتىق ءبيدىڭ مىڭ بۇرالعان كەرەمەتىن كورسەتىپ، ەۋروپالىق كورەرمەندەردىڭ ىستىق ىقىلاسىنا بولەندى;

• تالانتتى سوليستەر اينۇر نازاربەكوۆا مەن استانا قارعاباي وزدەرىنىڭ اسەرلى داۋىستارىمەن ءان شىرقاپ، كەشتىڭ كوركىن قىزدىردى.

بۇل اۋقىمدى مادەني شارا قازاق ونەرىنىڭ شەكارا تالعامايتىنىن، باۋىرلاستىق پەن بەيبىتشىلىكتىڭ سيمۆولى — «شاڭىراق» يدەياسىنىڭ الەم كەڭىستىگىندە اسقاقتاپ تۇرعانىن تاعى ءبىر مارتە دالەلدەدى. ەۋروپا جۇرتشىلىعى قازاق حالقىنىڭ باي مادەني مۇراسىمەن تانىسىپ، ۇلتتىق ونەرىمىزگە ءتانتى بولدى.

بريۋسسەلدە وتكەن بۇل ءدۇبىرلى دودا ەل تاۋەلسىزدىگىنىڭ ماڭىزىن ايشىقتاپ، حالىقارالىق مادەني بايلانىستاردى نىعايتۋ جولىنداعى تاريحي ماڭىزى زور تەگەۋرىندى قادام بولدى.

پىكىرلەر