جالپى، سوڭعى كەزدە ءبىز ونەر جۇلدىزدارىن قاتتى قىسىپ جىبەردىك. "ديماش قۇرلى جوقسىڭدار" دەدىك، "توي بيزنەس وكىلدەرى" دەدىك... قوعامدا ولارعا قارسى كادىمگىدەي نەگاتيۆ قالىپتاستى.
دەگەنمەن، بۇنى ايتپاساق ولارعا قيانات بولادى، ءبىزدىڭ ونەر جۇلدىزدارى "يۋتۋبتى" مەڭگەرە باستاعان ەكەن.
ەركە ەسماحان، "اللو" ءانى - 38 ملن كورىلىم.
ءاليا ابىكەن مەن قانات ۇمبەتوۆ - "جانىمدا بول" - 32 ملن كورىلىم.
ال وسى ەركەنىڭ "قايداسىڭ" - 90 ملن كورىلىمگە يە بولىپ، ءتىپتى تىڭدارمان اۋديتورياسى كوپ رەسەي انشىلەرىن دە شاڭ قاپتىرىپ كەتكەن ەكەن. بۇل ازىرشە ءبىزدىڭ رەكورد.
ەندى، سوڭعى كەزدە "وپماي وپماي" ءانى يۋتۋبتە جارىلعان بومبا بوپ شىعىپ، ونىڭ كورىلىمى اپتا ساناپ ميلليوندار قوسىپ كەلەدى. بۇگىندە ونىڭ كورىلىمى 30 ميلليوننان اسىپتى. حيت پا، حيت. ءبىر كورىلىم دەگەن تەك ءبىر عانا اي پي نومىرمەن سانالادى، "تەلەفونمەن قايتا قايتا كىرىپ كورىلىم ءوسىرۋ" دەگەن جوق، سىزدەر شاتاسپاڭىزدار. ياعني، ەركەنىڭ "قايداسىن" الەمدە 90 ملن ادام كورگەن.
"ويپىراي، قازاقستاندا سونشا حالىق جوق، بۇلاردى كىم تىڭدايدى سوندا" دەپ وسى كليپتەردىڭ استىنا ۇڭىلسەم، الدىمەن كورەتىنىم - جانىمىزداعى قىرعىزدار. قىرعىز بوورداشتاردى قازاقتىڭ حيت اندەرىنىڭ استىنا شەگەلەپ قويعان ءتارىزدى. اناۋ ءاليا ابىكەننىڭ "جانىمدا بول" ءانىنىڭ استى كىلەڭ قىرعىزداردىڭ كوممەنتتەرى عوي، اراسىنان قازاق تاپپادىم. قىرعىزدار جالپى قازاق ونەرىن ءسۇيىپ قارايدى ەكەن، ءبىزدىڭ كليپتەر مەن كينولاردىڭ ماڭى سولار جۇرەدى.
ودان، بۇل كليپتەردىڭ استىندا تاعى وزبەك، تاتار، ءازىربايجان، تۇرىك، باشقۇرت ...جالپى، زاتى تۇركى حالىقتارىنىڭ وكىلدەرى قاپتاپ ءجۇر.
ەگەر قازاق ونەرى وسى بەتىنەن تايماسا، ءبىزدىڭ مادەني، تىلدىك، رۋھاني ايامىز ءبىراز كەڭىپ قالايىن دەپ تۇر.
بۇنداي قۇبىلىستى كورگەندە ءبىز سياقتى قياليلاردىڭ يمپەريالىق امبيتسيالارى ويانادى ەكەن. راس، يۋتۋبتەگى قازاق انشىلەرىنىڭ اۋديتورياسىنا قاراپ كەيبىر امبيتسيالارىم ويانىپ ءجۇر.
جالپى، شىنى كەرەك، ءبىزدىڭ قازەكەڭ تۇركى حالىقتارىنىڭ اراسىندا اسىلدىڭ سىنىعىنداي بولعان شوقتىعى بيىك، ەرەكشە حالىق قوي. ءبىزدىڭ جاستار حالىقارالىق دارەجەدە وزدەرىنىڭ باسەكەگە تۇسە الاتىنىن دالەلدەپ كەلە جاتىر.
ديماش - الەمنىڭ الدىندا تاڭداي قاقتىرىپ قازاقتىڭ ولەڭ ايتا الاتىنىن دالەلدەدى.
سامال ەسلياموۆا - قازاقتىڭ حالىقارالىق دەڭگەيدە كينوعا تۇسە الاتىنىن كورسەتتى.
سپورت ساڭلاقتارى بۇنى باياعىدان دالەلدەپ كەلەدى.
ەندى شىركىن بىزدەن كەلەشەكتە ايگىلى ەكونوميست، اتاقتى ماتەماتيك، فيزيك، عىلىم ادامدارى، نوبەل سىيلىعىنىڭ لاۋرەاتتارى شىعادى دەپ ۇمىتتەنەمىن.
بۇيىرتسا شىعادى، ءبىز ءالى پوتەنتسيالى اشىلماعان حالىققا جاتامىز. ءبىزدىڭ بۇگىنگى دارىندارىمىز - سول زاماننىڭ العاشقى قارلىعاشتارى.
ولجاس ءابىل
"ادىرنا" ۇلتتىق پورتالى
