22 قىركۇيەك كۇنى اباي وبلىسىندا قازاقستاننىڭ حالىق ءارتىسى، كسرو حالىق ءارتىسى، اباي وبلىسىنىڭ قۇرمەتتى ازاماتى، ءانشى بيبىگۇل تولەگەنوۆانىڭ 95 جاسقا تولۋىنا ارنالعان «قازاقتىڭ بيبىگۇلى – حالىقتىڭ بۇلبۇل ءۇنى» اتتى كونتسەرت ءوتتى. بۇل تۋرالى وبلىستىق اكىمدىكتىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
ءان كەشىندە وتاندىق جانە شەتەلدىك كومپوزيتورلاردىڭ وپەرالارىنان اريالار، حالىق اندەرى، رومانستار، وركەسترلىك شىعارمالار ورىندالدى.
كونتسەرتتە امىرە قاشاۋباەۆ اتىنداعى مەملەكەتتىك فيلارمونيا جانىنداعى «بيبىگۇل» قازاق حالىق اسپاپتار وركەسترى، مادەنيەت سالاسىنىڭ ۇزدىگى نۇربەك ومىربەكوۆ، رەسپۋبليكالىق كونكۋرستاردىڭ لاۋرەاتى، امىرە قاشاۋباەۆ اتىنداعى مەملەكەتتىك فيلارمونيانىڭ ءانشىسى ايگەرىم توقتىباەۆا، رەسپۋبليكالىق كونكۋرستاردىڭ لاۋرەاتى، اباي وبلىسى اكىمىنىڭ ەسترادالىق-سيمفونيالىق وركەسترىنىڭ ءسوليسى ايگەرىم ءاشىروۆا ونەر كورسەتتى.
سونداي-اق كەش قوناقتارىنىڭ قاتارىندا قازاقستاننىڭ ەڭبەك سىڭىرگەن ءارتىسى مايرا يلياسوۆا، قازاقستاننىڭ ەڭبەك سىڭىرگەن قايراتكەرى تولقىن زابيروۆا، قازاقستاننىڭ ەڭبەك سىڭىرگەن قايراتكەرلەرى ازامات جىلتىركوزوۆ، جۇپار عابدۋللينا، بيبىگۇل تولەگەنوۆانىڭ حالىقارالىق ۆوكاليستەر بايقاۋىنىڭ جەڭىمپازى نۇرجان باجەكەنوۆ سىندى ونەر ساڭلاقتارى بولدى.
«قازاقتىڭ شوق جۇلدىزى، الەمگە ايگىلى سوپرانو داۋىسىنىڭ يەسى بيبىگۇل احمەتقىزى تولەگەنوۆانىڭ مەرەيتويىنا ارنالعان مەرەكەلىك كونتسەرتكە جينالىپ وتىرمىز. اسا قادىرلى بيبىگۇل احمەتقىزى، عاجايىپ داۋسىڭىزبەن قازاق ءان ونەرىن بيىككە كوتەرىپ، ۇلتتىق مادەنيەتىمىزدىڭ اسىل مۇراسىن الەمگە تانىتۋدا قوسقان ۇلەسىڭىز ەلدەن ەرەن. سىزگە مىقتى دەنساۋلىق، باياندى عۇمىر تىلەيمىز. الداعى ۋاقىتتا دا ونەرىڭىزدەن ءنار الىپ، جاستارىمىز ءسىزدىڭ ەڭبەك جولىڭىزدى ۇلگى ەتەدى دەپ سەنەمىز»، — دەدى ءوز قۇتتىقتاۋىندا وبلىس اكىمى نۇرلان ۇرانحاەۆ.
قازاق دالاسىن ءوز اندەرىمەن تەربەتكەن تانىمال تالانت يەسى 1929 جىلى 16 جەلتوقساندا سەمەي قالاسىندا دۇنيەگە كەلگەن. الماتى مەملەكەتتىك كونسەرۆاتورياسىن (قۇرمانعازى اتىنداعى قازاق ۇلتتىق كونسەرۆاتورياسىن) بىتىرگەن.
View this post on Instagram
<
