ۇكىمەت باسشىسى ءاليحان سمايىلوۆ سۋداعى قاۋىپسىزدىك شارالارىن كۇشەيتۋدى تاپسىردى، دەپ حابارلايدى «ادىرنا» ءتىلشىسى.
«جاز ەندى باستالدى، ال ەلىمىزدىڭ سۋ ايدىندارىندا قازا تاپقانداردىڭ سانى ۇلعايىپ بارادى. توتەنشە جاعدايلار مينيسترلىگىنىڭ مالىمەتى بويىنشا جازدىڭ ءبىرىنشى كۇنى عانا 4 ادام سۋعا كەتىپ، مەرت بولدى. الدىڭگۇنى ءبىر كۇندە 9 ادام، كەشە تاعى 4 ادام سۋعا كەتكەن. قايعىلى جاعدايلاردىڭ بارلىعى شومىلۋعا رۇقسات ەتىلمەگەن جەرلەردە ورىن العان. بۇل – شىنىمەن دە الاڭداتارلىق جاعداي»، — دەدى ءاليحان سمايىلوۆ.ۇكىمەت باسشىسى رەسپۋبليكادا جىل سايىن 300-گە جۋىق ادام سۋعا كەتىپ، قايتىس بولاتىنىن، ولاردىڭ 100-گە جۋىعى – بالالار ەكەنىن ايتتى.
«بۇل قابىلدانىپ جاتقان شارالاردىڭ جەتكىلىكسىز ەكەنىن كورسەتەدى. اباي، جەتىسۋ، ۇلىتاۋ وبلىستارىندا وسى ۋاقىتقا دەيىن شومىلۋعا رۇقسات ەتىلگەن ارنايى ورىندار بەلگىلەنبەگەن. ال قىزىلوردا وبلىسىندا بۇكىل ءوڭىر حالقى ءۇشىن ارنايى بەلگىلەنگەن 4-اق ورىن بار. الماتى وبلىسىندا قاپشاعاي سۋ قويماسىنىڭ ماڭىنداعى كوپتەگەن جەكە مەنشىك جاعاجايلار رەسمي تىركەلمەگەن»، — دەدى پرەمەر-مينيستر.وسىعان بايلانىستى ول ءوڭىر اكىمدىكتەرىنە توتەنشە جاعدايلار مينيسترلىگىمەن بىرلەسىپ، سۋعا شومىلۋعا ارنالعان قاۋىپسىز ورىنداردى بەلگىلەۋ جونىندەگى جۇمىستى كۇشەيتۋ، سونداي-اق قاۋىپسىزدىك شارالارى تۋرالى حالىقتى بەلسەندى تۇردە حاباردار ەتىپ وتىرۋدى تاپسىردى. ۇكىمەت باسشىسى پروفيلاكتيكالىق جۇمىستار نەگىزىنەن قالالار مەن اۋدانداردا عانا جۇرگىزىلەتىنىن ايتىپ ءوتتى. اۋىلدىق جەرلەردە بۇعان كوڭىل بولىنبەيدى.
«سول سەبەپتى سۋعا باتقانداردىڭ باسىم كوپشىلىگى، ياعني 60-70%-ى اۋىل تۇرعىندارى بولىپ وتىر. وسى باعىتتا جەرگىلىكتى جەرلەردە كەڭ اۋقىمدى جۇمىستاردى جۇرگىزۋ قاجەت. حالىقتىڭ نازارىنا سۋداعى قاۋىپسىزدىك تالاپتارىن، العاشقى كومەك كورسەتۋ ەرەجەلەرىن، ارنايى جاعاجايلار مەن قاۋىپتى ورىندار تۋرالى اقپاراتتى ۇنەمى جەتكىزۋ قاجەت»، — دەدى ءاليحان سمايىلوۆ.
ۇقساس جاڭالىقتار
