Úkimet basshysy Álıhan Smaıylov sýdaǵy qaýipsizdik sharalaryn kúsheıtýdi tapsyrdy, dep habarlaıdy «Adyrna» tilshisi.
«Jaz endi bastaldy, al elimizdiń sý aıdyndarynda qaza tapqandardyń sany ulǵaıyp barady. Tótenshe jaǵdaılar mınıstrliginiń málimeti boıynsha jazdyń birinshi kúni ǵana 4 adam sýǵa ketip, mert boldy. Aldyńgúni bir kúnde 9 adam, keshe taǵy 4 adam sýǵa ketken. Qaıǵyly jaǵdaılardyń barlyǵy shomylýǵa ruqsat etilmegen jerlerde oryn alǵan. Bul – shynymen de alańdatarlyq jaǵdaı», — dedi Álıhan Smaıylov.
Úkimet basshysy respýblıkada jyl saıyn 300-ge jýyq adam sýǵa ketip, qaıtys bolatynyn, olardyń 100-ge jýyǵy – balalar ekenin aıtty.
«Bul qabyldanyp jatqan sharalardyń jetkiliksiz ekenin kórsetedi. Abaı, Jetisý, Ulytaý oblystarynda osy ýaqytqa deıin shomylýǵa ruqsat etilgen arnaıy oryndar belgilenbegen. Al Qyzylorda oblysynda búkil óńir halqy úshin arnaıy belgilengen 4-aq oryn bar. Almaty oblysynda Qapshaǵaı sý qoımasynyń mańyndaǵy kóptegen jeke menshik jaǵajaılar resmı tirkelmegen», — dedi Premer-Mınıstr.
Osyǵan baılanysty ol óńir ákimdikterine Tótenshe jaǵdaılar mınıstrligimen birlesip, sýǵa shomylýǵa arnalǵan qaýipsiz oryndardy belgileý jónindegi jumysty kúsheıtý, sondaı-aq qaýipsizdik sharalary týraly halyqty belsendi túrde habardar etip otyrýdy tapsyrdy.
Úkimet basshysy profılaktıkalyq jumystar negizinen qalalar men aýdandarda ǵana júrgiziletinin aıtyp ótti. Aýyldyq jerlerde buǵan kóńil bólinbeıdi.
«Sol sebepti sýǵa batqandardyń basym kópshiligi, ıaǵnı 60-70%-y aýyl turǵyndary bolyp otyr. Osy baǵytta jergilikti jerlerde keń aýqymdy jumystardy júrgizý qajet. Halyqtyń nazaryna sýdaǵy qaýipsizdik talaptaryn, alǵashqy kómek kórsetý erejelerin, arnaıy jaǵajaılar men qaýipti oryndar týraly aqparatty únemi jetkizý qajet», — dedi Álıhan Smaıylov.
