شىركەۋدە قازاقشا ءمىناجات وقىعان ءدىن قىزمەتكەرىنىڭ مەملەكەتتىك تىلدە سويلەگەن جاڭا ۆيدەوسى تارادى. ءدىن قىزمەتكەرى قازاق ءتىلدى "مامىلە" ديسكۋسسيالىق توبىنىڭ مۇشەسى. بۇل جايلى ءتىل جاناشىرى ۆلاديسلاۆ تەن جازدى، دەپ حابارلايدى "ادىرنا" ۇلتتىق پورتالى.
شىركەۋدە مەملەكەتتىك تىلدە ءمىناجات وقىپ، قالىڭ قازاقتىڭ نازارىنا تۇسكەن ازاماتتىڭ ەسىم-cويى - ياكوۆ ۆورونتسوۆ.
ەلدى شۋلاتىپ جۇرگەن ۆيدەوداعى قازاقشا ءمىناجات وقىعان سۆياششەننيك ياكوۆ ۆورونتسوۆ, كانات تاسيبەكوۆ اعامىزدىڭ مامىلە قازاقشا ديسكۋسسيالىق كلۋبىنىڭ مۇشەسى. ءبىز ونى جاقىپ دەپ ايتامىز، - دەدى ۆ. تەن.
ورايى كەلگەندە ايتا كەتەيىك، يەروموناح ياكوۆ (ۆلاديمير يۋرەۆيچ ۆورونتسوۆ) 1986 جىلدىڭ 20 اقپانىندا الماتى قالاسىندا دۇنيەگە كەلگەن. اباي اتىنداعى پەداگوگيكالىق ۋنيۆەرسيتەتتىڭ تۇلەگى.
ءدىن قىزمەتكەرى ءوزىنىڭ فەيسبۋك الەۋمەتتىك جەلىسىن قازاقشا، ورىسشا جۇرگىزەدى. ءوزىنىڭ كەزەكتى جازباسىندا يەروموناح ياكوۆ بارشا مۇسىلمان قاۋىمىن "قادىر تۇنىمەن" قۇتتىقتادى:
- دوستارىم! بارىنە مۇسىلماندار قادىر تۇنىمەن قۇتتىقتايمىن! راقىمدىق تىلەمىن! - دەپ جازدى اۆتور.
جۋرناليست انگەلا مەرگەن ءدىن قىزمەتكەرىنىڭ مەملەكەتتىك تىلگە قۇلشىنىسى جايىندا بىلاي دەپ جازادى:
قاراعىم-اي، سىيلاستىق وسىنداي بولادى ەكەن...ياكوۆ ۆورونتسوۆ اكەيمەن وتكەن كوكتەمدە تانىسقان ەكەم. سول كەزدە قازاق تىلىندە بۇعان دەيىن ءبىر اۋىز ءسوز بىلمەي كەلگەن شىركەۋ قىزمەتكەرى "مەملەكەتتىك ءتىلدى ۇيرەنەمىن" دەپ، ءتىل وقۋعا كىرىسىپ كەتتى. سودان بەرى ءبىر-اق جىل ۋاقىت ءوتىپتى، اكەيدىڭ قازاق ءتىلىن مەڭگەرگەنى سونشالىق، كەشەگى ۋاعىز كەزىندەگى دۇعالارىن قازاق تىلىندە وقىدى!
تىلگە، ەلگە دەگەن قۇرمەت وسىنداي بولار؟! اسىرەسە "مەن قازاقپىن" دەگەن جازۋى بار جەيدەلەردى كيىپ، كوزگە ءتۇسۋدى جاقسى كورەتىن كەيبىر اتاققۇمالاردىڭ - نازارىنا!ايتپاقشىداي، ياكوۆ ۆورونتسوۆ بۇل كۇندەرى اقتوبە وبلىسىنىڭ شىركەۋلەرىن ارالاپ ءجۇر. ال ونىڭ قازاق تىلىندە وقىعان دۇعالارى الەۋجەلىگە تاراپ كەتتى. كوممەنتاريلەردى وقىساڭىزدار - ءتىپتى قىزىق! اسىرەسە ءبىر اي بۇرىن ماجىلىستە انت بەرۋ راسىمىندە ءتىلى كەكەشتەنىپ، الدىنداعى جازۋدى دا دۇرىس وقي الماعاندارعا - ناعىز ساباق!
يەروموناح ءوزىنىڭ ءمىناجاتتى نەلىكتەن قازاق تىلىندە وقىعانىن ايتىپ، سەبەبىن ءتۇسىندىردى.
– شىركەۋدە بۇدان كەيىن دە قازاق ءتىلى ەستىلگەنىن قالايمىن. سەبەبى، ءبىزدىڭ قاۋىم وكىلدەرى اراسىندا دا، ءدىني قىزمەتكەرلەر اراسىندا دا قازاقتار بار. جانە مەنىڭ ويىمشا، قازاقستاندىق ورىستار دا قازاق ءتىلىن ءبىلۋى كەرەك. ءبىزدىڭ حريستيانداردىڭ كوپشىلىگى ءورىستىلدى بولعانىمەن، قازاقتىلدى قاۋىم اراسىندا بىرتىندەپ قازاقشا سويلەسۋ تاجىريبەسىن ەنگىزۋ كەرەك، -دەدى ول.
"ادىرنا" ۇلتتىق پورتالى
