ماجىلىستە قازاق ءتىلى بويىنشا الىناتىن ەمتيحان قىزۋ تالقىعا ءتۇستى، دەپ حابارلايدى "ادىرنا" ۇلتتىق پورتالى Tengrinews-قا سىلتەپ.
ماجىلىستە تەحنيكالىق جانە كاسىپتىك ءبىلىم بەرۋ مەن كوشى-قون ماسەلەلەرىنە قاتىستى زاڭ جوباسى ءبىرىنشى وقىلىمدا قارالعان كەزدە دەپۋتات مۇرات ابەنوۆ ەڭبەك جانە حالىقتى الەۋمەتتىك قورعاۋ مينيسترلىگىنىڭ قانداستارعا ەنگىزگەن تالاپتارىن سىنعا الدى. ونىڭ ايتۋىنشا، بۇعان دەيىن قانداستار وزدەرى قالاعان وڭىرگە قونىستانا السا، قازىر پيلوتتىق جوبا اياسىندا تەك بەلگىلى ءبىر ايماقتارعا عانا جىبەرىلەدى. سونىمەن قاتار، بۇرىن قازاق تىلىنەن Kaztest تاپسىرماعان ەتنيكالىق قازاقتارعا ەندى مەملەكەتتىك تىلدەن ەمتيحان ەنگىزىلگەن. دەپۋتات شەتەلدەگى كوپتەگەن قازاق كيريلل ءالىپبيىن بىلمەيتىنىن ايتىپ، بۇل تالاپ ولاردىڭ قۇقىقتارىن شەكتەيتىنىن جەتكىزدى.
ءماجىلىس دەپۋتاتى كازىبەك يسا دا بۇل ماسەلەگە قاتىستى پىكىر بىلدىرگەن. ول ازاماتتىق كودەكستىڭ 17-بابىندا ەتنيكالىق قازاقتاردىڭ قازاق تىلىنەن ەمتيحان تاپسىرۋدان بوساتىلاتىنى كورسەتىلگەنىن ايتىپ، پيلوتتىق جوبا زاڭعا قايشى كەلۋى مۇمكىن ەكەنىن مالىمدەدى.
“قىتايداعى جانە باسقا ەلدەردەگى قازاقتار باسقا ءالىپبيدى قولدانادى. سوندىقتان ولاردان قازاق تىلىنەن تەست تالاپ ەتۋ قانشالىقتى ادىلەتتى؟” - دەدى دەپۋتات.
ءوز كەزەگىندە ەڭبەك جانە حالىقتى الەۋمەتتىك قورعاۋ ءمينيسترىنىڭ ءبىرىنشى ورىنباسارى ەربول تۇياقباەۆ بۇل تالاپ ازىرگە تەك پيلوتتىق جوبا اياسىندا ەنگىزىلگەنىن ايتتى.
“قانداس قازاقستاندا ءومىر سۇرگىسى كەلسە، كۇندەلىكتى ومىردە ويىن ەركىن جەتكىزە الۋى قاجەت. سوندىقتان قازاق ءتىلىن ءبىلۋ — مىندەتتى تالاپ. بۇل — حالىقارالىق تاجىريبە”، - دەدى تۇياقباەۆ.
