ء"تىلىمىز – تاتۋلىقتىڭ ءتىلى بولۋى ءتيىس": مينيستر دارحان قىدىرالى اسسامبلەيا جيىنىنا قاتىستى

2183
Adyrna.kz Telegram

بۇگىن قر اقپارات جانە قوعامدىق دامۋ ءمينيسترى دارحان قىدىرالى شىمكەنتتە قالالىق قازاقستان حالقى اسسامبلەيا جانىنداعى قوعامدىق قۇرىلىمداردىڭ جەتەكشىلەرىمەن، ەتنومادەني بىرلەستىكتەردىڭ توراعالارىمەن كەزدەستى.

«دوستىق ءۇيى» بازاسىنداعى «بىرلىك الاڭىنىڭ» جۇمىسىمەن تانىسىپ، جەرگىلىكتى ەتنوس وكىلدەرىمەن «دوڭگەلەك ۇستەل» باسىندا اشىق پىكىر الماستى.

قوعامدىق كەلىسىم مەن جالپىۇلتتىق بىرلىك سالاسىنداعى مەملەكەتتىك ساياسات اياسىندا بىرلەسە اتقاراتىن جۇمىستارعا توقتالعان مينيستر ءۇشىنشى مەگاپوليس تۇرعىندارىنىڭ بەرەكەلى بىرلىك جولىن جالعاپ وتىرعانىنا العىس ايتتى.

– ۇلىسىمىزدىڭ ۇيىتقىسى اتانعان وڭتۇستىك جۇرتشىلىعى ءاردايىم يگى ىستەردىڭ باستاماشىسى بولىپ وتىر. قالالىق اسسامبلەيا مۇشەلەرى قوعامداعى تۇعىرلى تاتۋلىعىمىزدى بەكەمدەپ، قايىرىمدىلىق باعىتىنداعى جۇمىستارعا تۇراقتى اتسالىسۋدا، دەدى دارحان قۋاندىقۇلى.

جيىندا قازاقستان وزبەكتەرى ەتنومادەني بىرلەستىكتەرى «دۋستليك» قاۋىمداستىعىنىڭ توراعاسى، قالالىق قحا توراعاسىنىڭ ورىنباسارى يكرامجان حاشيمجانوۆ قالالىق اسسامبلەيانىڭ اتقارعان جۇمىستارىن بايانداپ، ءوزارا باۋىرلاستىقتى نىعايتۋعا ارنالعان ءىس-شارالاردى رەسپۋبليكالىق دەڭگەيدە اقپاراتتىق قولداۋ كورسەتۋگە شاقىردى. سلاۆيان ەتنومادەني بىرلەستىگىنىڭ ءتورايىمى ناتاليا رومانوۆا «قازاقتانۋ» جوباسى بويىنشا ىسكە اسىپ جاتقان باستامالاردى ايتىپ، قر اقپارات جانە قوعامدىق دامۋ مينيسترلىگى ارقىلى «قازاقتانۋ» ارنايى اقپاراتتىق رەسۋرسىن قۇرۋدى ۇسىندى. تۇرىك ەتنومادەني بىرلەستىگىنىڭ توراعاسى لاتيپشا اسانوۆ ينۆەستيتسيا تارتۋ، «اسسامبلەيا جاستارى» ۇيىمى قالالىق وكىلدىگىنىڭ باسشىسى نۇربولات مەيىربەكوۆ جاستاردى قولداۋ تۋرالى ءسوز سويلەپ، ۇسىنىس-پىكىرلەرىن ايتتى.

اسسامبلەيا مۇشەلەرىن تىڭداعان مينيستر ۇلتىمىزدى ۇيىستىراتىن تىڭ جوبالارعا مەملەكەت تاراپىنان ءاردايىم دەمەۋ بولاتىنىن جەتكىزىپ، ەتنوس وكىلدەرى اراسىندا مەملەكەتتىك ءتىلدى دامىتۋ مەن «قازاقتانۋ» جوباسىن جاڭعىرتىپ، دامىتۋعا قولداۋ بىلدىرەتىنىن اتاپ ءوتتى.

– شىمكەنت شىرايلى شاھار بولۋىمەن قاتار، شۇعىلالى ءوڭىر. بۇگىندە قالا اۋماعىندا تۇراتىن ەتنوس وكىلدەرى بەرەكەلى بىرلىك جولىنداعى باستامالار اياسىنا توپتاسىپ، ەلدىك جولىنداعى ىستەرگە اتسالىسىپ كەلەدى. ءتىلىمىز – تاتۋلىقتىڭ ءتىلى بولۋى ءتيىس. بۇل باعىتتا شىمكەنتتىك اسسامبلەيا مۇشەلەرى وزگە ايماقتارعا ۇلگى بولا الادى، دەدى مينيستر.

ايتا كەتەيىك، بۇگىندە ەلىمىزدىڭ ءۇشىنشى مەگاپوليسى شىمكەنتتە 1 ميلليون 112 مىڭنان استام حالىق تۇرادى. ۇلتتىق قۇرامى بويىنشا تۇرعىنداردىڭ 30%-دان استامىن ەتنوس وكىلدەرى قۇرايدى. قالا اۋماعىندا 17 ەتنومادەني بىرلەستىك جانە ولاردىڭ جانىندا 19 شىعارماشىلىق ۇيىم مەن 3 جەكسەنبىلىك مەكتەپ ارەكەت ەتەدى.

پىكىرلەر