قوعامدىق كەڭەستەر ينستيتۋتى مەملەكەت پەن قوعام اراسىنداعى بايلانىستى نىعايتىپ كەلەدى. بۇگىندە ەلىمىزدە 264 قوعامدىق كەڭەس بار. ونىڭ 36-سى – رەسپۋبليكالىق، 228-ءى – جەرگىلىكتى دەڭگەيدە جۇمىس ىستەيدى. كەڭەس مۇشەلەرىنىڭ 74%-ىن ازاماتتىق قوعام وكىلدەرى قۇرايدى.
قوعامدىق كەڭەستەر ازاماتتاردىڭ مەملەكەتتىك شەشىمدەردى قابىلداۋ ۇدەرىسىنە قاتىسۋىنا جانە قوعامدىق باقىلاۋدى جۇزەگە اسىرۋىنا مۇمكىندىك بەرەدى.
2026 جىلدىڭ العاشقى جارتىجىلدىعىندا قوعامدىق كەڭەستەر ازاماتتاردىڭ قۇقىقتارى، بوستاندىقتارى مەن زاڭدى مۇددەلەرىنە قاتىستى 3 400-دەن استام نورماتيۆتىك قۇقىقتىق اكتىنىڭ جوباسىن قارادى.
وسى كەزەڭدە حالىقتى اۋىز سۋمەن قامتاماسىز ەتۋ، سانيتاريالىق-ەپيدەميولوگيالىق قاۋىپسىزدىك، الەۋمەتتىك قورعاۋ، ءبىلىم بەرۋ، تۇرعىن ءۇي-كوممۋنالدىق شارۋاشىلىعى جانە وزگە دە وزەكتى ماسەلەلەر بويىنشا 495-تەن استام قوعامدىق تىڭداۋ وتكىزىلدى.
قوعامدىق كەڭەستەر قىزمەتىنىڭ نەگىزگى باعىتتارىنىڭ ءبىرى – مەملەكەتتىك ورگانداردىڭ قوعام الدىنداعى ەسەپ بەرۋىن قامتاماسىز ەتۋ. جىل باسىنان بەرى رەسپۋبليكالىق جانە جەرگىلىكتى مەملەكەتتىك ورگانداردىڭ جانە كۆازيمەملەكەتتىك سەكتور ۇيىمدارى باسشىلارىنىڭ 990 ەسەبى تىڭدالدى. تالقىلاۋ قورىتىندىسىندا مەملەكەتتىك باسقارۋدىڭ تيىمدىلىگىن ارتتىرۋ، تسيفرلاندىرۋدى دامىتۋ، مەملەكەتتىك قىزمەتتەردىڭ ساپاسىن جاقسارتۋ، ازاماتتاردىڭ وتىنىشتەرىمەن جۇمىستى جەتىلدىرۋ جانە مەملەكەتتىك ورگانداردىڭ اشىقتىعىن كۇشەيتۋ جونىندە ۇسىنىمدار ازىرلەندى.
قوعامدىق كەڭەستەر ازاماتتاردىڭ وتىنىشتەرىن قاراۋعا دا ايرىقشا ءمان بەرەدى. بيىلعى العاشقى جارتىجىلدىقتا الەۋمەتتىك قورعاۋ، دەنساۋلىق ساقتاۋ، ينفراقۇرىلىم، جەر قاتىناستارى جانە باسقا دا الەۋمەتتىك ماڭىزى بار ماسەلەلەرگە قاتىستى 900-دەن استام ءوتىنىش قارالدى. ولاردىڭ 60%-دان استامى وڭ شەشىمىن تاپتى.
قوعامدىق كەڭەستەردىڭ قىزمەتى kazkenes.kz بىرىڭعاي اقپاراتتىق پورتالى ارقىلى جۇرگىزىلەدى. پورتالدا قوعامدىق كەڭەستەردىڭ قۇرامى، وتىرىستاردىڭ كۇن ءتارتىبى مەن حاتتامالارى، بەينەترانسلياتسيالار جانە قوعامدىق باستامالار جاريالانىپ تۇرادى. پورتال ىسكە قوسىلعالى بەرى وعان 1,8 ميلليونعا جۋىق پايدالانۋشى كىرگەن.
رەسپۋبليكالىق جانە جەرگىلىكتى قوعامدىق كەڭەستەردىڭ جۇمىسىن ۇيلەستىرۋ ماقساتىندا مادەنيەت جانە اقپارات مينيسترلىگى جانىنان ۇيلەستىرۋ ورتالىعى قۇرىلعان. ورتالىق قوعامدىق كەڭەستەرگە ادىستەمەلىك قولداۋ كورسەتىپ، وزىق تاجىريبەلەردى بولىسۋگە جانە قوعامدىق باقىلاۋدى جۇزەگە اسىرۋدىڭ ورتاق تاسىلدەرىن قالىپتاستىرۋعا ىقپال ەتەدى.
