كەشە جاڭاوزەن قالاسىنان استاناعا كەلگەن «بەرالى» كومپانياسىنىڭ جۇمىسشىلارى «قازمۇنايگاز» عيماراتىنىڭ الدىندا تۇنەدى. جاڭاوزەندىكتەر وزدەرى جۇمىس ىستەيتىن كومپانيانىڭ تەندەرىن "كەزبي" مەن «Ai-Bis» كومپانياسىنىڭ ۇتىپ العانىنا نارازى. سەبەبى ولار «اتالعان كومپانيالار نارىق قۇنىنان الدەقايدا ارزان تەندەر ۇتىپ العاننان كەيىن جوعارى جالاقى بەرە المايدى» دەگەن پىكىردە. ال ەنەرگەتيكا ءمينيسترى الماسادام ساتقاليەۆ نارازىلارمەن كەزدەسىپ، ءمان-جايدى نەگە بىلمەي وتىر؟
بۇگىن ۇكىمەت وتىرىسىندا جۋرناليستەر الماسادام ساتقاليەۆكە جاڭاوزەندىك جۇمىسشىلاردىڭ ماسەلەسىن سۇراق رەتىندە قويدى. ءمينيستردىڭ ايتۋىنشا، جاڭاوزەندىك جۇمىسشىلاردىڭ تالاپتارى بويىنشا رەسمي شەشىم ازىرلەنىپ جاتىر. سونداي-اق ول «مۇنايشىلار ەنەرگەتيكا مينيسترلىگىنىڭ اۋماعىنا توپتاسقان كەزدە ولاردىڭ تالاپتارى شاشىراڭقى بولعانىن» تىلگە تيەك ەتتى.
ونىڭ سوزىنشە كوتەرىلگەن بىرنەشە تالاپتىڭ ىشىندە «وزەنمۇنايگاز» كاسىپورنىنا جۇمىسقا تۇرعىزىپ بەرۋ جانە بۇعان دەيىن وتكەن تەندەردىڭ كۇشىن جويۋ تالاپتارى قويىلعان.
«جالپى، ولارمەن ديالوگ ۇيىمداستىرىلدى. ەڭبەك جانە الەۋمەتتىك قورعاۋ مينيسترلىگىنىڭ وكىلدەرى بولدى. ەنەرگەتيكا مينيسترلىگىنىڭ دەپارتامەنت ديرەكتورلارى بولدى. ولار ديالوگكە كىرىسكەن جوق، بىراق سول ماڭدا احۋالدى باقىلاپ، ادامدارمەن سويلەستى، تالاپتارىن ناقتىلادى. قازىر ءبىز رەسمي ۇستانىم ازىرلەپ جاتىرمىز»، - دەدى الماسادام ساتقاليەۆ.
جۋرناليستەر مينيستردەن «جاڭاوزەننەن استاناعا كەلگەن جۇمىسشىلارعا نەگە بارمادىڭىز؟» دەپ سۇرادى. الماسادام ساتقاليەۆ كۇمىلجىپ، اپ-ايقىن سۇراققا ناقتى جاۋاپ بەرمەي تۇلكىبۇلاڭعا سالدى.
ال جاڭاوزەندىك ازاماتتار تۇسكە دەيىن «قازمۇنايگاز» باسشىلارى مەن قۇزىرلى ورگان وكىلدەرىمەن كەزدەستى. الايدا جۇمىسشىلاردىڭ وكىلى جولمۇرات لۇقپان كەلىسسوزدىڭ ءساتسىز وتكەنىن ەسكەرتتى.
«بۇگىن ءبىز تاڭعى ساعات 06:00-دە ۇشاقپەن استاناداعى اۋەجايدان تۇستىك. جۇمىسشىلاردىڭ جارتى بولىگى كولىكپەن كەلە جاتىر، ال قالعانى جالاقى تۇسكەن سوڭ كەلەمىز دەپ وتىر. قازىر ەڭ باستى دۇنيە قارجى عوي، اقشاسى بولماسا ەشكىم ەشقايدا شىعا المايدى. ءبىزدىڭ جىگىتتەر ۇجىم بولىپ جاقسى قارىم-قاتىناس كورسەتەدى جانە ءبىز ەشقانداي ءتارتىپ بۇزىپ، ءار ءتۇرلى ساياسي دۇنيەگە بارمايمىز. تەك قانا ەڭبەك داۋىمەن ءجۇرمىز.
وسىنداعى باسشىلار ءبىزدىڭ ارامىزدان كەلىسسوزگە 10 ادامنىڭ شىعۋىن سۇراعان بولاتىن. ەڭبەك ينسپەكتسياسى، پروكۋراتۋرا، قۇقىق قورعاۋ جانە «قازمۇنايگاز» وكىلدەرىنىڭ قاتىسۋىمەن جيىن ءوتتى. بۇدان بولەك ماڭعىستاۋ وڭىرىندەگى كەشەگى تەندەردى ۇتىپ العان "كەزبي" جانە Ai-Bis كومپانياسىنىڭ وكىلدەرى قاتىستى.
جيىندا «قازمۇنايگاز» كومپانياسىنىڭ باسشىلارى تەندەردى ءبىرىنشى كەزەڭدە "كەزبي" جانە ەكىنشى كەزەڭدە Ai-Bis كومپانياسى ۇتىپ الدى دەپ ايتتى. ولار ءبىزدى اتالعان كومپانياعا ءبولىنىپ جۇمىسقا بارۋىمىزدى سۇراپ وتىر. ياعني، ولار «ءبىز 150 ادامدى جۇمىسپەن قامتاماسىز ەتە الامىز، ال قالعان 90 ادام "كەزبي" كومپانياسىنا باراسىڭدار» دەپ وتىر»، – دەيدى ول.
ايتسە دە جولمۇرات لۇقپان بۇل ۇسىنىسقا جۇمىسشىلار ءبىر اۋىزدان قارسى ەكەنىن ايتتى. سەبەبى ولار تەندەردى الدەقايدا تومەن باعادا ۇتىپ العان كومپانيا كۇنى ەرتەڭ جالاقىنى تومەندەتەدى دەگەن پىكىر ايتتى.
«مىسالى قاڭتار ايىنان ناۋرىزعا دەيىنگى ىستەگەن جۇمىستىڭ قارجىلىق كولەمى ساعاتىنا 80 مىڭ تەڭگە بولاتىن. اتالعان قارجىنى ءبىر كوزدەن وسى ۋاقىتقا دەيىن «بەرالى» كومپانياسىنا بەردى. نەگە؟ سەبەبى الدا كەلە جاتقان سايلاۋ تىنىش ءوتسىن دەدى. اشىعىن ايتقاندا "كەزبي" مەكەمەسىمەن «بەرالى» كومپانياسى ءبىر بىرىمەن قاتتى باسەكەلەس بولىپ كەلەدى. كەزىندە ءبىزدى «جۇمىستى توقتاتىپ قويدىڭدار» دەپ "كەزبي" كومپانياسى ايىپتاپ، 19 ادامدى جۇمىستان شىعاردى. سول 19 ازاماتقا قولداۋ كورسەتكەن 150 ادام ءوز ەركىمەن جۇمىستان شىعىپ، «بەرالى» كومپانياسىنا اۋىسقان ەدىك. سول جۇمىسشىلار اۋىز بىرشىلىك كوسەتىپ، 4 ايدىڭ ىشىندە سىزدەرگە وتىرىك، ماعان شىن جاڭاوزەن قالاسىندا «بەرالى» كومپانياسىنىڭ دەڭگەيىن "كەزبي" مەكەمەسىنە جەتكىزدىك»، – دەيدى جولمۇرات لۇقپان.
جۇمىسشىلار تەندەردى 6 اي نەمەسە 1 جىلعا ەمەس، 4-5 جىلعا بىردەن بەرۋ كەرەك دەگەن ۇستانىمدا. الايدا بۇل تالاپ تىلەككە ۇكىمەت قۇلاق اسا ما؟
سەرىك جولداسباي
"ادىرنا" ۇلتتىق پورتالى
