ليتۆادا پرەمەر-مينيستر گينتاۋتاس پالۋتسكاس باسقاراتىن 19-شى مينيسترلەر كابينەتى وتستاۆكاعا كەتتى. بۇل شەشىم 4 تامىز كۇنى وتكەن ۇكىمەت وتىرىسىندا رەسمي تۇردە جاريالاندى، دەپ حابارلايدى «ادىرنا» ءتىلشىسى.
پالۋتسكاستىڭ ءوزى قىزمەتىن توقتاتۋ تۋرالى شەشىم قابىلداعان. ول بۇعان دەيىن وتباسىنا كورسەتىلىپ جاتقان قىسىم جاعدايىندا جۇمىسىن جالعاستىرۋ مۇمكىن ەمەستىگىن مالىمدەگەن بولاتىن.
«مەنى جۇمىسىما ەمەس، وتكەن ومىرىمە بولا ايىپتاپ جاتىر. كواليتسيا مەن ۇكىمەتتى بۇل جانجالداردىڭ تۇتقىنىنا اينالدىرعىم كەلمەيدى»،—دەپ ءتۇسىندىردى پالۋتسكاس.
ول بۇل لاۋازىمعا بايلانىپ قالماعانىن ايتىپ، ارىپتەستەرىنە بىرلەسكەن جۇمىسى ءۇشىن العىسىن ءبىلدىردى.
داعدارىسقا پرەمەردىڭ بيزنەسىنە قاتىستى قارجىلىق زاڭبۇزۋشىلىقتار تۋرالى تەرگەۋلەر سەبەپ بولعان. ولاردىڭ ىشىندە جەڭىلدەتىلگەن نەسيەلەر مەن جىلجىمايتىن مۇلىككە قاتىستى مامىلەلەر بار. بىرپارتيالىق سەرىكتەرىنىڭ قولداۋىنا قاراماستان، ليتۆا پرەزيدەنتى گيتاناس ناۋسەدانىڭ ۋلتيماتۋمىنان كەيىن پالۋتسكاسقا قىسىم كۇشەيە تۇسكەن.
مينيسترلەر كابينەتىن قارجى ءمينيسترى ريمانتاس شادجيۋس ۋاقىتشا باسقاراتىن بولدى. پرەزيدەنت 15 كۇن ىشىندە پرەمەر-مينيسترلىككە جاڭا كانديدات ۇسىنۋى ءتيىس، ال ونى سەيم بەكىتەدى.
