Keshe Jańaózen qalasynan Astanaǵa kelgen «BerÁli» kompanııasynyń jumysshylary «QazMunaıGaz» ǵımaratynyń aldynda túnedi. Jańaózendikter ózderi jumys isteıtin kompanııanyń tenderin "Kezbı" men «Ai-Bis» kompanııasynyń utyp alǵanyna narazy. Sebebi olar «Atalǵan kompanııalar naryq qunynan áldeqaıda arzan tender utyp alǵannan keıin joǵary jalaqy bere almaıdy» degen pikirde. Al Energetıka mınıstri Almasadam Sátqalıev narazylarmen kezdesip, mán-jaıdy nege bilmeı otyr?
Búgin Úkimet otyrysynda jýrnalıster Almasadam Sátqalıevke Jańaózendik jumysshylardyń máselesin suraq retinde qoıdy. Mınıstrdiń aıtýynsha, jańaózendik jumysshylardyń talaptary boıynsha resmı sheshim ázirlenip jatyr. Sondaı-aq ol «Munaıshylar Energetıka mınıstrliginiń aýmaǵyna toptasqan kezde olardyń talaptary shashyrańqy bolǵanyn» tilge tıek etti.
Onyń sózinshe kóterilgen birneshe talaptyń ishinde «ÓzenMunaıGaz» kásipornyna jumysqa turǵyzyp berý jáne buǵan deıin ótken tenderdiń kúshin joıý talaptary qoıylǵan.
«Jalpy, olarmen dıalog uıymdastyryldy. Eńbek jáne áleýmettik qorǵaý mınıstrliginiń ókilderi boldy. Energetıka mınıstrliginiń departament dırektorlary boldy. Olar dıalogke kirisken joq, biraq sol mańda ahýaldy baqylap, adamdarmen sóılesti, talaptaryn naqtylady. Qazir biz resmı ustanym ázirlep jatyrmyz», - dedi Almasadam Sátqalıev.
Jýrnalıster mınıstrden «Jańaózennen Astanaǵa kelgen jumysshylarǵa nege barmadyńyz?» dep surady. Almasadam Sátqalıev kúmiljip, ap-aıqyn suraqqa naqty jaýap bermeı túlkibulańǵa saldy.
Al Jańaózendik azamattar túske deıin «QazMunaıGaz» basshylary men quzyrly organ ókilderimen kezdesti. Alaıda jumysshylardyń ókili Jolmurat Luqpan kelissózdiń sátsiz ótkenin eskertti.
«Búgin biz tańǵy saǵat 06:00-de ushaqpen Astanadaǵy áýejaıdan tústik. Jumysshylardyń jarty bóligi kólikpen kele jatyr, al qalǵany jalaqy túsken soń kelemiz dep otyr. Qazir eń basty dúnıe qarjy ǵoı, aqshasy bolmasa eshkim eshqaıda shyǵa almaıdy. Bizdiń jigitter ujym bolyp jaqsy qarym-qatynas kórsetedi jáne biz eshqandaı tártip buzyp, ár túrli saıası dúnıege barmaımyz. Tek qana eńbek daýymen júrmiz.
Osyndaǵy basshylar bizdiń aramyzdan kelissózge 10 adamnyń shyǵýyn suraǵan bolatyn. Eńbek ınspekııasy, prokýratýra, quqyq qorǵaý jáne «QazMunaıGaz» ókilderiniń qatysýymen jıyn ótti. Budan bólek Mańǵystaý óńirindegi keshegi tenderdi utyp alǵan "Kezbı" jáne Ai-Bis kompanııasynyń ókilderi qatysty.
Jıynda «QazMunaıGaz» kompanııasynyń basshylary tenderdi birinshi kezeńde "Kezbı" jáne ekinshi kezeńde Ai-Bis kompanııasy utyp aldy dep aıtty. Olar bizdi atalǵan kompanııaǵa bólinip jumysqa barýymyzdy surap otyr. Iaǵnı, olar «Biz 150 adamdy jumyspen qamtamasyz ete alamyz, al qalǵan 90 adam "Kezbı" kompanııasyna barasyńdar» dep otyr», – deıdi ol.
Áıtse de Jolmurat Luqpan bul usynysqa jumysshylar bir aýyzdan qarsy ekenin aıtty. Sebebi olar tenderdi áldeqaıda tómen baǵada utyp alǵan kompanııa kúni erteń jalaqyny tómendetedi degen pikir aıtty.
«Mysaly qańtar aıynan naýryzǵa deıingi istegen jumystyń qarjylyq kólemi saǵatyna 80 myń teńge bolatyn. Atalǵan qarjyny bir kózden osy ýaqytqa deıin «BerÁli» kompanııasyna berdi. Nege? Sebebi alda kele jatqan saılaý tynysh ótsin dedi. Ashyǵyn aıtqanda "Kezbı" mekemesimen «BerÁli» kompanııasy bir birimen qatty básekeles bolyp keledi. Kezinde bizdi «Jumysty toqtatyp qoıdyńdar» dep "Kezbı" kompanııasy aıyptap, 19 adamdy jumystan shyǵardy. Sol 19 azamatqa qoldaý kórsetken 150 adam óz erkimen jumystan shyǵyp, «BerÁli» kompanııasyna aýysqan edik. Sol jumysshylar aýyz birshilik kósetip, 4 aıdyń ishinde sizderge ótirik, maǵan shyn Jańaózen qalasynda «BerÁli» kompanııasynyń deńgeıin "Kezbı" mekemesine jetkizdik», – deıdi Jolmurat Luqpan.
Jumysshylar tenderdi 6 aı nemese 1 jylǵa emes, 4-5 jylǵa birden berý kerek degen ustanymda. Alaıda bul talap tilekke Úkimet qulaq asa ma?
Serik Joldasbaı
"Adyrna" ulttyq portaly
