قازاقستان ەرىكتىلەرىنىڭ «ەركىندىك پەرىشتەلەرى» اتتى قايىرىمدىلىق جوباسى 3 ءساۋىر كۇنى ۋكراينانىڭ چەرنيگوۆ قالاسىنداعى بومبا-پانالاردى جابدىقتاۋعا ات سالىستى. پاناجاي ورنالاسقان قوس مەكتەپ بيىلعى وقۋ جىلىندا العاش رەت ەسىگىن اشىپ، وففلاين رەجيمىندە وقىتۋدى باستادى، دەپ حابارلايدى "ادىرنا" ۇلتتىق پورتالى.
سوڭعى جىلى ۋكراينادا سوعىس قيمىلدارى سالدارىنان 2500-دەن استام وقۋ ورنى زارداپ شەكتى. ولاردىڭ 400-دەن استامى قالپىنا كەلتىرۋگە مۇلدەم كەلمەيتىن جاعدايدا قيراعان.
2022 جىلدىڭ ماۋسىم ايىندا قازاقستاندىقتار چەرنيگوۆتاعى (سولتۇستىك ۋكراينا) مەكتەپتەردى قالپىنا كەلتىرۋگە كومەك سقراعان ۋكرايندىق ەرىكتىلەرمەن بايلانىستى. قالاعا ۇرىس قيمىلدارىنىڭ كەسىرىنەن 34 مەكتەپتىڭ 27-ءسى زارداپ شەككەنى حابارلاندى.
ۋكراين مەكتەپتەرىنە كومەكتەسۋ ءۇشىن قازاقستاننان ەرىكتىلەر ارنايى تولوكالار دايىندادى. ياعني، بارلىعى باس قۇراپ، پەرىشتەلەر بەينەسىندەگى ءداستۇرلى ۋكرايندىق موتانكا قۋىرشاقتارىن جاساۋ ءىس-شارالارىن ۇيىمداستىردى. ارنايى كادەسىيلار جارمەڭكەلەردە ساتىلعان. تۇسكەن قاراجاتتىڭ بارلىعى ۋكرايندىق ءبىلىم بەرۋ مەكەمەلەرىن قايتا قالپىنا كەلتىرۋ ءۇشىن جولدانعان.
«ءبىز وتكەن جىلى، ماۋسىم ايىندا، استانادا تۇڭعىش رەت تولوكا وتكىزدىك. سودان بەرى ءبىزدىڭ تولوكالارىمىز تۇراقتى تۇردە ءوتتى. جوبا ءۇشىن جينالعان ۆولونتەرلىك توپتار ءتورت وبلىس: استانا، الماتى، قاراعاندى جانە پاۆلوداردا جۇمىس ىستەپ جاتىر. جوبا وتكەن سەگىز ايدىڭ ىشىندە ءبىز چەرنيگوۆتاعى ەكى مەكتەپتىن بومباپانالارىن جابدىقتاۋعا كومەكتەستىك، ولار بيىل العاش رەت وففلاين رەجيمىندە ءبىلىم بەرۋدى باستادى»، - دەدى جوبا ۇيلەستىرۋشىلەرىنىڭ ءبىرى يرينا سەمەنچۋك.
ۋكرايناداعى جاڭا ەرەجەلەرگە سايكەس، قازىرگى سوعىس جاعدايىندا، اۋە شابۋىلدارى كەزىندە ەگەر مەكتەپتىڭ جەراستى بومپا-پانالارى بولماسا، بالالار وفلاين رەجيمدە جۇمىس ىستەي المايدى. ۋكراينادا مۇنداي دابىلدار ءجيى بولىپ تۇرادى. ادەتتە، 20 مينۋتتان 4 ساعاتقا دەيىن سوزىلادى. وسى ۋاقىت ارالىعىندا بالالار بومباپانادا بولۋى ءتيىس.
«كوپتەگەن ۋكراين مەكتەپتەرىنىڭ جەرتولەلەرى بەلگىلى سەبەپتەرگە بايلانىستى باسپاناعا بەيىمدەلمەگەن. تىنىش كەزدە جەرتولەلەر نەگىزىنەن تۇرمىستىق قاجەتتىلىكتەرگە جانە كوكونىستەردى ساقتاۋعا پايدالانىلدى. سوندىقتان ولاردى رەتتەپ، از ۋاقىتتا وقۋ پروتسەسىن ۇيىمداستىرا الۋ ءۇشىن ءىرى ينۆەستيتسيالار قاجەت. قولدان كەلگەن كومەكتى كورسەتۋگە تىرىسامىز»، – دەيدى جوبانىڭ تاعى ءبىر ۇيلەستىرۋشىسى ەۆگەني ريبالكو.
№6 چەرنيگوۆ مەكتەبى 2022 جىلدىڭ ناۋرىز ايىندا تۇسكەن زىرىراننىڭ كەسىرىنەن قاتتى زاقىمدانعان. عيمارات قيراماسا دا، جارىلىس سالدارىنان مەكتەپتىڭ 88 تەرەزەسى قاعىپ، 36 باتارەيا بۇلىنگەن. قازىر مەكتەپ مەملەكەت قاراجاتى ەسەبىنەن قالپىنا كەلتىرىلدى، بىراق قازاقستاندىق ەرىكتىلەر مەن بەلگيادان كەلگەن دونورلار بومباپانانى جابدىقتاۋعا كومەكتەستى. جوندەۋ جۇمىستارىنان بولەك، ەرىكتىلەر 260 جينالمالى ورىندىق، 80 جينالمالى ۇستەل، ەكى ءورت سوندىرگىش، 3 جىلىتقىش، سونداي-اق مارشرۋتيزاتورلار، ۇزارتقىشتار جانە باسقا دا جابدىقتار ساتىپ الدى.
№13 چەرنيگوۆ مەكتەبى چەرنيگوۆكە اۋە شابۋىلىنان زارداپ شەككەن، بىراق امان قالعان ايماقتاعى ءۇش مەكتەپتىڭ ءبىرى. قازىر مۇندا اۋە بومبالارىنىڭ تىكەلەي سوققىسىنان تولىقتاي قيراپ، قالپىنا كەلتىرۋگە جاتپايتىن كورشىلەس ەكى مەكتەپتىڭ – №18 جانە №21 مەكتەپتىڭ بالالارى دا وقىتىلادى.
قازاقستاندىق ەرىكتىلەر بىردەن كومەك قولىن ۇسىنا ءبىلدى جانە ولاردىڭ جاردەمدەرى چەرنيگوۆ مەكتەپتەرى ءۇشىن ماڭىزدى بولدى.
"ادىرنا" ۇلتتىق پورتالى
