قازاقستاندا اەروتاكسي قىزمەتىن ىسكە قوسۋ جوسپارلانىپ وتىر، دەپ حابارلايدى "ادىرنا" ۇلتتىق پورتالى.
بۇل تۋرالى كولىك ءمينيسترى نۇرلان ساۋرانباەۆ مالىمدەدى.
ءمينيستردىڭ ايتۋىنشا، ۆەدومستۆو قازىرگى تاڭدا ۇشقىشسىز اۋە كولىكتەرىن، ونىڭ ىشىندە جولاۋشىلار تاسىمالىن رەتتەيتىن قۇقىقتىق بازانى ازىرلەۋ بويىنشا جۇمىس جۇرگىزىپ جاتىر. وسى باعىتتاعى زاڭ جوباسىن 2026 جىلى دايىنداپ، پارلامەنت قاراۋىنا ەنگىزۋ جوسپارلانعان.
«بۇل جەردە باستى ماسەلە – قاۋىپسىزدىك. قاۋىپسىزدىك تولىق قامتاماسىز ەتىلسە، قالعان سۇراقتاردىڭ بارلىعى شەشىلەدى»، – دەدى مينيستر نۇرلان ساۋرانباەۆ.
جۋرناليستەردىڭ سۇراعىنا جاۋاپ بەرگەن مينيستر اەروتاكسي قازاقستاندا 2027 جىلى ىسكە قوسىلۋى ابدەن مۇمكىن ەكەنىن اتاپ ءوتتى. ونىڭ سوزىنشە، مۇنداي تەحنولوگيا قازىردىڭ وزىندە الەمنىڭ كەيبىر ەلدەرىندە قولدانىلىپ جاتىر.
ء«بىز شەنچجەن قالاسىندا بولدىق. ول جەردە اەروتاكسي قىزمەتىن پايدالانۋعا بولادى، بىراق ۇشۋ كەزىندە پيلوت باسقارۋى مىندەتتى»، – دەدى ول.
قازاقستاندا اۋە تاكسيىن ەنگىزۋ كەزەڭ-كەزەڭىمەن جۇزەگە اسىرىلىپ، جولاۋشىلار قاۋىپسىزدىگى باستى نازاردا بولادى. بۇعان دەيىن ەلىمىزدە جاڭا الاتاۋ قالاسىندا اەروتاكسي جۇيەسىن دامىتۋ ماقساتىندا قۇنى 300 ملن دوللار بولاتىن ەلەكتر ۇشاقتارىن ساتىپ الۋ جوسپارلانىپ وتىرعانى حابارلانعان ەدى.
