قوعام بەلسەندىسى شولپان عابباسوۆا قازاقستان حالقى اسسامبلەياسىنىڭ قىزمەتىنە قاتىستى ازاماتتىق پىكىر ءبىلدىردى. اۆتوردىڭ ايتۋىنشا، اسسامبلەيا وكىلدەرى قازاق ەلىنىڭ باسىنا تۇسكەن سىن شاقتاردا بۇعىپ قالىپ، قازاق ءتىلى مەن قازاق توپىراعىنا قاتىستى تارتىستى تاقىرىپتاردا جۇمعان اۋزىن اشپاي كەلەدى، دەپ جازدى "ادىرنا" ۇلتتىق پورتالى.
فەيسبۋك الەۋمەتتىك جەلىسىندە شولپان عابباسوۆانىڭ اسسامبلەياعا قاتىستى ازاماتتىق پىكىرى تارادى. قازاق ەلى ازاماتتارىنىڭ دەنى اسسامبلەيانىڭ تاراتىلۋىن قالايدى. بۇل جايلى اۆتور:
- اسسامبلەيانىڭ قۇرىلعاننان بەرگى جۇمىسى ءنول دەپ ەسەپتەيمىن. اسسامبلەيا ەتنوستارى وزدەرىن، ءوز تىلدەرى مەن سالت-داستۇرلەرىن، مادەنيەتىن جارنامالاۋمەن عانا اينالىستى. ارينە، قازاق رەتىندە ول ماعان قىزىق. بىراق، قازاقستانداعى ەشبىر ەتنوس ءوز ەتنوسى ىشىندە قازاق تاريحىن، ءتىلىن، سالتىن ۇلىقتاۋعا، قازاق ۇلتىنىڭ مەملەكەتتى قۇراۋشى ۇلت ەكەنىن، ەلدىڭ دە، جەردىڭ دە يەسى قازاق ۇلتى ەكەنىن مويىنداۋعا، قازاقيادا قازاقتار انا تىلىندە جاۋاپ الۋعا، انا تىلىندە قىزمەت كورسەتۋىن تالاپ ەتۋگە قۇقىقتى ەكەنىن مويىنداۋعا جۇمىس جۇرگىزبەدى. ۇلتتار بىرلىگى مەن ءوزارا سيلاستىعىن ارتتىرۋدا رول اتقارمادى، جامبىل وبلىسىنداعى، قاراعاندىداعى، ت.ب. جەرلەردەگى قاقتىعىستاردا ارااعايىن بولا المادى. ورىس ەتنوسىنىڭ وكىلدەرى قازاقتىڭ تاريحىن جوققا شىعارىپ، دومبىراسىن سىندىرىپ، قازاق ۇلتىن قورلايتىن، تەرريتوريالىق تۇتاستىعىنا قاتىستى ارانداتۋ سوزدەرىن ايتىپ جاتقاندا جۇمعان اۋىزدارىن اشپادى. تەنتەكتەرىن تارتىپكە شاقىرىپ، قىلمىستىق جاۋاپكەرشىلىككە تارتىلۋىن تالاپ ەتپەدى. رەسەي شەنەۋنىكتەرى مەن ساياساتكەرلەرىنىڭ قازاقستان جايلى نەگىزسىز قورلاۋ، ايىپ سوزدەرىن ەستي وتىرا ءۇنسىز قالدى.قازاقستاندا قازاق ءتىلىنىڭ پروبلەماسى بار ەكەنىن بىلە وتىرا قحا «جوق، ءبىزدىڭ قازاقستاندا 2023 جىل قازاق ءتىلى جىلى بولسىن، ورىس ءتىلى جىلى بولۋىنا قارسىمىز. قازاق تىلىنە قولداۋ كەرەك» دەپ ايتا الا ما ەكەن؟سوندىقتان اسسامبلەيانىڭ جۇمىسىنا بەرەتىن ءنول دەگەن باعام ورىندى دەپ ويلايمىن جانە حالىقتىڭ اقشاسىنان-بيۋدجەتىنەن ءبولىنىپ وتىرعان قاراجاتتى ۇنەمدەۋ ءۇشىن قحا تاراتىلسىن دەگەن تالاپقا قوسىلامىن، - دەپ پىكىر ءبىلدىردى.
ورايى كەلگەندە ايتا كەتەيىك، قازاقستان حالقى اسسامبلەياسى 1995 جىلعى 1 ناۋرىزدا قازاقستان رەسپۋبليكاسىنىڭ پرەزيدەنتىنىڭ جارلىعىمەن قۇرىلعان مەملەكەت باسشىسى جانىنداعى كونسۋلتاتيۆتى-كەڭەسشى ورگان. نەگىزىنەن العاندا، ولاردىڭ باستى ماقساتى مەملەكەتتىڭ شاڭىراعىن كوتەرگەن نەگىزگى ۇلتتىڭ، قازاقتىڭ، توڭىرەگىنە توپتاسۋ. ۇلتتىق ساياسات مەن ۇلتتىق مۇددەنىڭ جۇزەگە اسۋىنا قىزمەت ەتۋ، قوعامدا ەتنيكالىق دۇردارازدىقتىڭ تۋماۋى ءۇشىن ءتيىمدى ساياسات جۇرگىزۋ بولىپ سانالادى.
"ادىرنا" ۇلتتىق پورتالى
