اقتوبە وبلىسىنىڭ اكىمدىگى قوبدا اۋدانىندا سۋ تاسقىنىنان زارداپ شەككەن تۇرعىندار ءۇشىن جاڭا ۇيلەر سالىناتىندىعىن مالىمدەدى، دەپ جازدى "ادىرنا" ۇلتتىق پورتالى.
13 ناۋرىزدان بەرى قوبدا اۋىلىندا 79 ءۇي، 22 اۋلا اۋماعى ەرىگەن قار سۋىنىڭ استىندا قالعان.
اقتوبە وبلىسىنىڭ اكىمى ەرالى توعجانوۆ قوبدا اۋدانىنا ساپارى بارىسىندا ءتيىستى تاپسىرما بەردى. الداعى ۋاقىتتا قوبدا اۋىلىنداعى ۇيلەرى سۋ استىندا قالعان تۇرعىندار ءۇشىن 24 ءۇي سالىنادى.
زالالدى باعالاۋ جونىندەگى كوميسسيانىڭ الدىن-الا مالىمەتتەرىنە سايكەس، 3 ءۇي قالپىنا كەلتىرىلمەيدى، 4 ءۇيدىڭ قابىرعالارى قۇلاعان، ولار اپاتتى دەپ تانىلدى.
ءوڭىر باسشىلىعى ءۇش وتباسىعا بيۋدجەتتەن تىس قاراجات ەسەبىنەن تۇرعىن ءۇي ساتىپ الۋدى جوسپارلاعان. دەگەنمەن ەلدى-مەكەندە بوس تۇرعىن ءۇي تابىلمادى. سوعان بايلانىستى جاڭادان ءۇي سالۋ جونىندە شەشىم قابىلداندى.
قازىرگى ۋاقىتتا ەلدىمەكەندە سۋ تاسقىنى دەڭگەيىنىڭ تومەندەۋى بايقالادى. جاساندى سۋ جيناۋ، قۇم توسەۋ جانە سۋ ايداۋ جۇمىستارى جالعاسىپ جاتىر. تابيعي قۇبىلىستىڭ زارداپتارىن بەيتاراپتاندىرۋ ءۇشىن 38 بىرلىك مامانداندىرىلعان تەحنيكا، 277 ادام جۇمىلدىرىلعان.
"ادىرنا" ۇلتتىق پورتالى
