سولتۇستىك قازاقستان وبلىسىنداعى سەرگەەۆ جانە پەتروپاۆل سۋ قويمالارىندا جاعداي تۇراقتى، دەپ حابارلايدى "ادىرنا" ءتىلشىسى سۋ رەسۋرستارى جانە يرريگاتسيا مينيسترلىگىنە سىلتەپ.
مينيسترلىكتىڭ ءباسپاسوز قىزمەتى سۋ قويمالارى شتاتتىق كەستەگە ساي جۇمىس ىستەپ جاتقانىن، بۇزىلۋ قاۋپى جوق ەكەنىن اتاپ ءوتتى.
ۆەدومستۆو مالىمەتىنشە 10 ءساۋىر كۇنى سەرگەەۆ سۋ قويماسىندا سۋدىڭ ماكسيمالدى دەڭگەيى - 4 مەتر 25 سم تىركەلگەن.
"10 ساۋىردەن باستاپ سۋ كولەمىنىڭ كۇندەلىكتى 10-15 سم تومەندەۋى بايقالادى. سۋدىڭ ماكسيمالدى اعىنى سەكۋندىنا 4870 تەكشە مەتر بولدى. بۇل رەتتە سۋ تورابىنىڭ وتكىزۋ مۇمكىندىگى سەكۋندىنا 11 400 تەكشە مەتر ەكەنىن ايتا كەتكەن ءجون. بۇگىنگى تاڭدا سۋ اعىنى سەكۋندىنا 581 تەكشە مەتر. سەرگەەۆ سۋ تورابى كوپ فاكتورلى تەكسەرۋدەن وتكەن، تەحنيكالىق جاعدايى قاناعاتتانارلىق. سۋ قويماسىندا سۋ تاسقىنىنىڭ بەلسەندى كەزەڭى ءوتتى", - دەلىنگەن مينيسترلىك مالىمدەمەسىندە.
ال پەتروپاۆل سۋ قويماسىنا قاتىستى:
"وسى ساعاتتا سۋ اعىنى سەكۋندىنا 3 923 تەكشە مەتر. سۋ تورابىنىڭ وتكىزۋ مۇمكىندىگى سەكۋندىنا 6 330 تەكشە مەتر. اتالعان سۋ تورابى دا 2022 جىلى كوپ فاكتورلى تەكسەرۋدەن ءوتتى", - دەلىنگەن حابارلامادا.
ۆەدومستۆونىڭ مالىمەتىنشە، 2023 جىلى ەكى سۋ ەلەكتر كەشەنىنىڭ جۇمىسىنا قاتىستى قاۋىپسىزدىك دەكلاراتسياسى بەرىلگەنى ايتىلدى.
