Aqtóbe oblysynyń ákimdigi Qobda aýdanynda sý tasqynynan zardap shekken turǵyndar úshin jańa úıler salynatyndyǵyn málimdedi, dep jazdy "Adyrna" ulttyq portaly.
13 naýryzdan beri Qobda aýylynda 79 úı, 22 aýla aýmaǵy erigen qar sýynyń astynda qalǵan.
Aqtóbe oblysynyń ákimi Eraly Toǵjanov Qobda aýdanyna sapary barysynda tıisti tapsyrma berdi. Aldaǵy ýaqytta Qobda aýylyndaǵy úıleri sý astynda qalǵan turǵyndar úshin 24 úı salynady.
Zalaldy baǵalaý jónindegi komıssııanyń aldyn-ala málimetterine sáıkes, 3 úı qalpyna keltirilmeıdi, 4 úıdiń qabyrǵalary qulaǵan, olar apatty dep tanyldy.
Óńir basshylyǵy úsh otbasyǵa bıýdjetten tys qarajat esebinen turǵyn úı satyp alýdy josparlaǵan. Degenmen eldi-mekende bos turǵyn úı tabylmady. Soǵan baılanysty jańadan úı salý jóninde sheshim qabyldandy.
Qazirgi ýaqytta eldimekende sý tasqyny deńgeıiniń tómendeýi baıqalady. Jasandy sý jınaý, qum tóseý jáne sý aıdaý jumystary jalǵasyp jatyr. Tabıǵı qubylystyń zardaptaryn beıtaraptandyrý úshin 38 birlik mamandandyrylǵan tehnıka, 277 adam jumyldyrylǵan.
"Adyrna" ulttyq portaly
