2022 جىلدىڭ 19 تامىزىندا ۇلتتىق قاۋىپسىزدىك كوميتەتى شەكارا قىزمەتىنە قاراستى تاراز قالاسىنداعى «ءشولدالا» شەكارا بولىمىندە بورىشىن وتەپ ءجۇرىپ، سۋيتسيد جاسادى دەگەن 2004 جىلعى بەكبول ميراشتىڭ كيىمدەرىنەن ق. دەگەن ازاماتتىڭ، ا. دەگەن ازاماتتىڭ جانە ك. دەگەن ازاماتتىڭ شاۋەتتەرى تابىلدى. بۇل تۋرالى ادۆوكات ايمان وماروۆا ءمالىم ەتتى، دەپ حابارلايدى "ادىرنا" ۇلتتىق پورتالى Azattyq Ruhy سايتىنا سىلتەمە جاساپ.
وماروۆانىڭ ايتۋىنشا، سوڭعى وقيعالاردان كەيىن ساربازدىڭ اتا-اناسى ودان كومەك سۇراعان. سوندىقتان، ىسكە قاتىستى جاسالعان بارلىق سوت-مەديتسينالىق ساراپتامانى قولىنا الىپ، مۇقيات قاراعان جانە الەۋمەتتىك جەلىدە تىكەلەي ەفير وتكىزە وتىرىپ، بەكبول ميراشتىڭ فۋتبولكاسىنان ناقتى ەسىمدەرى جازىلعان ءۇش ەر ادامنىڭ جانە ەسىمى بەلگىسىز تاعى ەكى ەر ادامنىڭ، بارلىعى بەس ادامنىڭ بيوماتەريالى تابىلعانىن اشىق ءمالىم ەتتى.
«مەنىڭ ارىپتەسىم (ادۆوكات سەرجان پراليەۆ – رەد.) بەكبول ميراشتىڭ ىسىندە وزگە ەر ادامداردىڭ بيوماتەريالدارى، ياعني شاۋەتتەرى تابىلعانىن ءمالىم ەتكەن ەدى. مەنىڭ ايتارىم، بۇل – راس. ول سوت ساراپتاما قۇجاتتارىندا انىق جازىلعان فاكت. ول قۇجاتتاردىڭ ءبارىن قاراپ، مەن بۇل ىستە زورلىق بولعان دەپ سانايمىن. سوت-مەديتسينالىق ساراپتاماسىنان قىسقاشا ءۇزىندى وقىعاننىڭ وزىندە، جاعداي سۇمدىق: قازا تاپقان جىگىتتىڭ اۋزىنان قان ارالاس شاۋەت تابىلعان. بىراق تەرگەۋ «ول جىگىتتىڭ ءوزىنىڭ شاۋەتى» دەگەن. الايدا، وزدەرىڭىز ويلاڭىزدارشى، بالا سوندا ءوز شاۋەتىن ءوز اۋزىنا قۇيعان با؟ جارايدى، تەرگەۋدىڭ بۇل ارەكەتىنە كوز جۇمدىق دەيىك. بىراق ءبىر ەمەس، بىرنەشە ساراپتاما جاسالعان»، - دەگەن ايمان وماروۆا ساراپتامالاردا بىرنەشە ەر ادامنىڭ بيوماتەريالى تەكسەرىلگەنىن جانە تەكسەرۋدەن وتكەن بيوماتەريالدار بويىنشا شاۋەت ناقتى كىمدەردىكى ەكەنى انىق جازىلعانىن ايتادى.
ادۆوكاتتىڭ مالىمدەمەسىنە جۇگىنسەك، ول ەر ادامداردىڭ بۇل اسكەري بولىمگە تىكەلەي قاتىسى بار، بىراق وماروۆا ولاردىڭ كىم ەكەنىن، ياعني قاتارداعى سارباز با، الدە اسكەري ءبولىم قىزمەتكەرى مە، جاريا ەتكەن جوق. تەك شاۋەتى تابىلعان ادامنىڭ ءبىرى بەكبول ميراشتىڭ ىسىندە قازىر كۋاگەر بولىپ جۇرگەنى انىق.
«مولەكۋلالىق-گەنەتيكالىق ساراپتاما بىلاي دەپ جازادى: جىگىتتىڭ فۋتبولكاسىندا كۋاگەر ق. دەگەن ازاماتتىڭ شاۋەتى تابىلعان. ودان باسقا كەمى ەكى ەر ادامنىڭ شاۋەتى تابىلعانى جازىلعان. ق. دەگەن ازاماتپەن قاتار، ا. دەگەن ازاماتتىڭ جانە ك.دەگەن ازاماتتىڭ بيومەتاريالدارى تابىلدى. سوندا سوت-ساراپتاما ناقتى ءۇش ازاماتتىڭ بيوماتەريالىن تاپقان. ودان باسقا تاعى ەكى بەلگىسىز ەر ادامنىڭ بيوماتەريالى بار. سوندا بۇل نە بولعانى!؟» - دەيدى ادۆوكات.
ايمان وماروۆا وسىلايشا ميراش بەكبولدىڭ ىسىندە ناقتى زورلىق-زومبىلىق بەلگىسى بار ەكەنىن، جانە قازىر كەمى بەس ەر ادامنىڭ شاۋەتى بويىنشا دەرەك بار ەكەنىن، بىراق تەرگەۋ ساراپتامادا اتى ايتىلىپ تۇرعان ءۇش ادامعا قاتىستى ءتىپتى ءىس قوزعالماعىن ايتىپ وتىر. ياعني وماروۆا بۇل ىستە بۇرمالاۋ بار بولۋى مۇمكىن ەكەنىن جانە تەرگەۋ ميراش بەكبولدى سۋيتسيدكە يتەرمەلەدى دەگەن ايىپپەن قاماۋدا وتىرعان سەرجانت ايبەك نۇرتاەۆتىڭ ىسىنە عانا باسىمدىق بەرىپ وتىرعانىن ايتتى.
«سوت ساراپتاماسى بويىنشا ناقتى وسى كىسىلەردىڭ شاۋەتى انىقتالعان. تۇسىنەسىزدەر مە!؟ وسىنىڭ بارىنە قاراماستان، تەرگەۋ ءىستى قىسقارتتى ما، بىلمەيمىن، بىراق بۇل اتى ايتىلعان ءۇش ازاماتقا قاتىستى ءىس تىركەلمەگەن. تەك قانا سەرجانتقا قاتىستى ءىس تىركەپ، سونى سوتقا جىبەرگىسى كەلىپ وتىر. ال سەرجانتتىڭ زورلىق-زومبىلىققا قاتىسى جوق بولسا كەرەك، ويتكەنى ساراپتامادا وعان قاتىستى مالىمەت جوق. ارينە ول سەرجانتتىڭ باسقا باپتار بويىنشا زاڭسىز ارەكەتتەرى بار بولۋى دا، بولماۋى دا مۇمكىن. ول تۋرالى ازىرگە ايتا المايمىن. بىراق بۇل ساربازدىڭ ولىمىندە ناقتى زورلىق-زومبىلىق بولعانىنىڭ دالەلدەرى بار جانە ءبىز قازىر ءىستىڭ تەك ءبىر شەتىن عانا ايتىپ وتىرمىز»، - دەيدى ادۆوكات ايمان وماروۆا.
سوندىقتان، بۇل ايتىلعانداردى ەسكەرە وتىرىپ ايمان وماروۆا الەۋمەتتىك جەلىدە تىكەلەي ەفير وتكىزدى، ەفير كەزىندە ول پرەزيدەنتتەن كومەك سۇرادى.
«مىنانداي جاعداي بولىپ جاتقان كەزدە اسكەرگە سەنىم جوق بولىپ تۇر. پرەزيدەنتتەن سۇرايتىنىمىز، وسى ءىستى باسقا قۇقىق قورعاۋ ورگانىنىڭ تەرگەۋىنە جىبەرۋ كەرەك، ەكىنشىدەن ءىستى ءوز باقىلاۋىنا السا دەيمىز»، - دەدى ايمان وماروۆا.
"ادىرنا" ۇلتتىق پورتالى
