قازاقستان مامىر ايىنان بەرى توقتاپ تۇرعان «درۋجبا» مۇناي قۇبىرى ارقىلى مۇناي جەتكىزۋدى قايتا باستاۋعا دايىن. بۇل تۋرالى ەنەرگەتيكا مينيسترلىگى مالىمدەدى، دەپ حابارلايدى «ادىرنا» ءتىلشىسى.
«رەسمي سۇراۋ جولدادىم. قازىر قازاقستان تاراپى رەسەي تاراپىنان مۇناي جەتكىزۋدى قايتا باستاۋ ماسەلەسىنە قاتىستى جاۋاپ كۇتىپ وتىر»، – دەدى مينيستر ەرلان اقكەنجەنوۆ.
ونىڭ سوزىنشە، قازاقستاندا مۇناي جەتكىزۋدى قايتا باستاۋعا قاجەتتى تەحنيكالىق مۇمكىندىك بار. ەندى استانا رەسەي تاراپىنىڭ جاۋابىن كۇتۋدە.
قازاقستان مۇنايىن گەرمانياعا «درۋجبا» قۇبىرى ارقىلى جەتكىزۋ 1 مامىردان باستاپ توقتاتىلعان بولاتىن. وسىدان كەيىن مۇناي باسقا لوگيستيكالىق باعىتتارعا جونەلتىلدى. رەسەي پرەمەر-ءمينيسترىنىڭ ورىنباسارى الەكساندر نوۆاك جەتكىزىلىمنىڭ توقتاتىلۋىن «تەحنيكالىق مۇمكىندىكتەرگە» بايلانىستى دەپ تۇسىندىرگەن.
رەسەي اۋماعىندا «درۋجبا» مۇناي قۇبىرى ارقىلى تاسىمالداۋدى «ترانسنەفت» كومپانياسى قامتاماسىز ەتەدى. بەلارۋس اۋماعىندا قۇبىر ەكى تارماققا بولىنەدى. وڭتۇستىك تارماعى ۋكراينا ارقىلى ۆەنگرياعا، ال سولتۇستىك تارماعى پولشا مەن گەرمانياعا باعىتتالعان. وڭتۇستىك باعىتتاعى ۋكراينا ۋچاسكەسى 22 ساۋىردە قايتا ىسكە قوسىلعان بولاتىن.
