سۋ تاسقىنىنان كەيىن بيزنەستىڭ شىعىنىن وتەۋ ءۇشىن ۇكىمەت رەزەرۆىنەن 12 ميلليارد تەڭگە ءبولىندى، دەپ حابارلايدى “ادىرنا” ۇلتتىق پورتالى پرەمەر-ءمينيستردىڭ ءباسپاسوز قىزمەتىنە سىلتەمە جاساپ.
“قازاقستان ۇكىمەتى الاپات سۋ تاسقىنىنان كەيىن شاعىن جانە ورتا بيزنەستىڭ مۇلىككە قاتىستى شىعىندارىن وتەۋ ءۇشىن ءوز رەزەرۆىنەن 12 ملرد تەڭگەدەن استام قارجى ءبولۋ تۋرالى قاۋلى قابىلدادى” دەلىنگەن حابارلامادا.
بەلگىلى بولعانداي كوميسسيالار كاسىپكەرلەردىڭ وتىنىمدەرىن قابىلداۋدا.
مەملەكەت باسشىسى قاسىم-جومارت توقاەۆتىڭ تاپسىرماسى بويىنشا ۇكىمەت سۋ تاسقىنى سالدارىن جويۋ بويىنشا كەشەندى جۇمىس جۇرگىزۋدە. قابىلدانىپ جاتقان شارالاردىڭ ىشىندە ازاماتتاردى جاڭا تۇرعىن ۇيمەن قامتاماسىز ەتۋ، بىرجولعى قارجىلىق كومەك كورسەتۋ، ۇيلەردى جوندەۋ مەن قالپىنا كەلتىرۋ شىعىندارىن وتەۋ جانە ت. ب. بار.
زارداپ شەككەن بيزنەسكە كەلتىرىلگەن زالالدى وتەۋ جۇمىسى باستالدى. قازىرگى تاڭدا وڭىرلىك كوميسسيالار شاعىن جانە ورتا كاسىپكەرلىك سۋبەكتىلەرىنىڭ جالپى سوماسى 1,5 ملرد تەڭگەگە 178 ءوتىنىمىن قاراپ، ماقۇلدادى.
جالپى العاندا، اكىمدىكتەردىڭ الدىن الا باعالاۋى بويىنشا 746 شوب سۋبەكتىسى زارداپ شەكتى. ولاردىڭ قاتارىندا ازىق-تۇلىك دۇكەندەرى، كافەلەر، تقكو، قوناق ۇيلەر جانە باسقالارى بار. بۇگىندە باعالاۋ جانە سمەتالىق جۇمىستار جۇرگىزىلۋدە، ولاردىڭ قورىتىندىسى بويىنشا وتىنىمدەر وڭىرلىك كوميسسيالاردىڭ قاراۋىنا ەنگىزىلەدى.
وسىلايشا، ۇكىمەت رەزەرۆىنەن 12 ملرد تەڭگەدەن استام قاراجات شوب مۇلىك شىعىندارىن وتەۋ ءۇشىن اقمولا، اقتوبە، اتىراۋ، باتىس قازاقستان، قوستاناي جانە سولتۇستىك قازاقستان وبلىستارىنىڭ بيۋدجەتىنە اۋدارىلادى.
سۋ تاسقىنى سالدارىن جويۋ جونىندەگى جۇمىس ۇكىمەت باسشىلىعىنىڭ تۇراقتى باقىلاۋىنا الىنعان. ەستەرىڭىزگە سالا كەتەيىك، بۇعان دەيىن توتەنشە رەزەرۆتەن باتىس قازاقستان جانە قوستاناي وبلىستارىندا اۋەدەگى ەلەكتر بەرۋ جەلىلەرىن قالپىنا كەلتىرۋگە 2,4 ملرد تەڭگەدەن استام قارجى بولىنگەن بولاتىن.
