19 اقپاندا استانادا قازاق تاريحىنداعى 125 تۇلعا جايلى سىر شەرتەتىن «قازاقستان ۇلتتىق پانتەونى» اتتى تاريحي-تانىمدىق كىتاپتىڭ تانىستىرىلىمى ءوتتى، دەپ حابارلايدى “ادىرنا” ۇلتتىق پورتالى Qazaqstan-عا سىلتەپ.
جوبا «قازمۇنايگاز» ۇلتتىق كومپانياسى اكتسيونەرلىك قوعامىنىڭ باستاماسىمەن جۇزەگە اسقان. كىتاپ بىلتىر اتاپ وتىلگەن قازاق مۇنايىنىڭ 125 جىلدىعىنا وراي شىعارىلدى.
قر پارلامەنتى سەناتىنىڭ دەپۋتاتى دارحان قىدىرالى بۇل ەڭبەكتىڭ اتاۋىنا ەرەكشە ءمان بەرىلگەنىن ايتتى.
“بۇل كىتاپقا «پانتەون» دەگەن اتاۋ بەرۋدىڭ ءبىر سەبەبى – مۇندا باقيلىق بولعان تۇلعالار قامتىلعان. سونىمەن قاتار، بۇل ەڭبەكتى وقۋ ارقىلى تاريحىمىزدى تەرەڭىرەك تانىپ، تاعىلىم الامىز. سوندىقتان، بۇل سيمۆوليكالىق ءمانى زور اتاۋ”، - دەدى ول ءوز سوزىندە.
كىتاپتا تاريحي تۇلعالاردىڭ ءومىربايانى، ەڭبەكتەرى جانە ولاردىڭ قوعامعا قوسقان ۇلەسى ناقتى دەرەكتەرمەن باياندالعان. باسىلىم قازاق جانە ورىس تىلدەرىندە 2 000 دانامەن جارىق كوردى. كىتاپ سىي رەتىندە تاراتىلىپ، جوعارى وقۋ ورىندارىنىڭ كىتاپحانالارىنا تەگىن بەرىلمەك.
ارداگەر زەينوللا الشىنباەۆ:
“ارىستان باب، قوجا احمەت ياساۋي، بەكەت اتا، ءال-فارابي، اباي، ىبىراي التىنسارين سىندى قازاقتىڭ دارا تۇلعالارىنىڭ ءومىر جولىن ءبىر جيناققا توپتاستىرۋ – قۇندى ءارى قاجەت جوبا. ولاردىڭ ەڭبەكتەرى مەن تاعىلىمىن كەلەر ۇرپاققا جەتكىزۋ وتە ماڭىزدى”، - دەپ سۇحبات بەردى.
جوبا جەتەكشىلەرىنىڭ ايتۋىنشا، «قازاقستان ۇلتتىق پانتەونى» كىتابى تاريحي تۇلعالاردىڭ ءومىرى مەن قىزمەتىن تانىستىرىپ قانا قويماي، ولاردىڭ ونەگەسى مەن وسيەتىن دارىپتەۋدى كوزدەيدى.
