قازاقستاندا اسكەري كۇشتەردى موبيليزاتسيا جانە توتەنشە جاعدايلار كەزىندە دايارلانعان كادرلارمەن تولىقتىرۋ ماقساتىندا رەزەرۆتىك اسكەري كۇشتەر قۇرىلاتىن بولادى، دەپ حابارلايدى "ادىرنا" ۇلتتىق پورتالى.
بۇل نورمالار «رەزەرۆتەگى اسكەري قىزمەت تۋرالى» زاڭعا ەنگىزىلگەن وزگەرىستەر مەن تولىقتىرۋلاردا قاراستىرىلعان.
«بۇل تۇزەتۋلەر اسكەرلەردى دايىن كادرلارمەن تولىقتىرۋعا مۇمكىندىك بەرەدى. سونىمەن قاتار سوعىس ارەكەتتەرىنە دايىن رەزەرۆتىك كۇشتەردى قۇرۋدى قامتاماسىز ەتەدى. مۇنداي اسكەري قىزمەت ءتۇرىن ەنگىزۋ اسكەرلەردىڭ بەيبىت ۋاقىتتا سانىنىڭ ۇلعايۋىنسىز، بەلگىلەنگەن مىندەتتەردى ورىنداۋعا دايىن ازاماتتار توبىن دايارلاۋعا مۇمكىندىك بەرەدى»، - دەدى دەپۋتات ەرمۇرات باپي.
زاڭنىڭ قورىتىندىسىنا سايكەس، اسكەري كۇشتەردى دايارلانعان ازاماتتارمەن تولىقتىرۋ موبيليزاتسيا كەزەڭىندە دە، تابيعي نەمەسە تەحنوگەندىك توتەنشە جاعدايلار كەزىندە دە قاجەت.
جاڭا «اسكەري رەزەرۆيست» ۇعىمى ەنگىزىلەدى. ول وقۋ نەمەسە جاتتىعۋلار كەزىندە اسكەري قىزمەتكەر مارتەبەسىن الادى. سونىمەن قاتار زاڭ جوباسىندا رەزەرۆيستەردىڭ جالاقىسى، زەينەتاقى تولەمدەرى، الەۋمەتتىك مەديتسينالىق ساقتاندىرۋعا مىندەتتى جارنالار مەن اۋدارىمدار ماسەلەلەرى قاراستىرىلعان.
2023 جىلدىڭ قاراشا ايىندا ءماجىلىس وسى زاڭ جوباسىن ءبىرىنشى وقىلىمدا قاراپ، قورىتىندى جاساعان بولاتىن. ول كەزدە قورعانىس ءمينيسترى رۋسلان جاقسىلىقوۆ قۇجاتتى قابىلداۋدىڭ قاجەتتىلىگى تۋرالى مالىمدەگەن ەدى.
رەزەرۆتىك كۇشتەر 2025 جىلدان باستاپ قۇرىلىپ، رەزەرۆيستەرمەن ءۇش جىلدىق ەرىكتى كەلىسىمشارت جاسالاتىن بولادى. ولار قىزمەتىن تۇرعىلىقتى جەرى بويىنشا وتەيدى جانە جىلىنا ەكى ايدان اسپايتىن وقۋ مەرزىمىمەن، ونىڭ ىشىندە 30 كۇندىك جيناقتار مەن اي سايىنعى ەكى-ءۇش كۇندىك وقۋ ساباقتارىمەن دايىندالادى. رەزەرۆيستەرگە اي سايىن مينيمالدى جالاقى تولەنەدى.
ءبىرىنشى كەزەڭدە 2 مىڭ ادام شاقىرۋ جوسپارلانۋدا.
