قازاق ەلىندە ءومىر ءسۇرىپ جاتقان ەتنيكالىق كارىس ازاماتى ۆلاديسلاۆ تەن قازاق تىلىنە دەگەن قىزىعۋشىلىعىنىڭ قالاي ويانعانىن ايتىپ، جان تەبىرەنتەر جازبا جاريالادى. كارىس ازاماتىنىڭ ايتۋىنشا، قازاق حالقىنىڭ شاپاعاتىن كورگەن وزگە ەتنوس وكىلدەرى وتە كوپ. اۆتوردىڭ باستى ارمانى دا قازاق ەلىنىڭ ءاربىر ازاماتىن قازاقشا ەركىن سويلەيتىن دەڭگەيگە جەتكىزۋ، دەپ حابارلايدى “ادىرنا” ۇلتتىق پورتالى.
اۆتور ءوز ءسوزىنىڭ كىرىسپەسىندە تەرەڭ تاريحتى تولعادى:
- ءبىزدىڭ اتا-بابالارىمىز 1937 جىلى دەپورتاتسياعا ۇشىراپ قازاق جەرىنە ەرىكسىز كەلىپ تۇسكەندە قازاقتار ولارمەن سوڭعى نانىن ءبولىسىپ، اجالدان قۇتقارىپ، كومەك بەرگەنى ءۇشىن كورەي حالقىنان العىس بىلدىرەمىن.
سول كەزدە قازاق حالقى اتا-بابالارىمىزعا قول ۇشىن بەرمەگەندە مەنىڭ ءوزىم دە، مەنىڭ ەكى بالالارىم دا، مەنىڭ كوپتەگەن تۋىس-تۋىستارىم دا بۇل دۇنيەگە كەلمەس ەدىك جانە وسى العىسىمدى ءدال قازىر جازىپ وتىرماس ەدىم. قازاق جەرى كورەيلەر ءۇشىن كيەلى ءارى قاسيەتتى جەر بولىپ تابىلادى.
مەن تاشكەنت قالاسىندا تۋعانمىن. مەنىڭ وتانىم، تۋعان جەرىم - وزبەكستان. اكە-شەشەم مەن تۋعان قارىنداسىم مەنەن بۇرىن قازاقستانعا قونىس اۋدارعان ەدى. دەگەنمەن اتا-انامنىڭ جالعىز ۇلى بولعاننان كەيىن كورەي مادەنيەتىن ساقتاۋ ءۇشىن ولارمەن بىرگە ءومىر ءسۇرۋىم كەرەك ەكەنىن مەن دە، ولار دا ءبىلىپ، ءبىر كۇنى ولاردىڭ "بالام، سەن استاناعا كەپ وسى جەردە بىرگە تۇرايىق!" دەگەن شاقىرۋىمەن وسى جەرگە كەلىپ مەن ءۇشىن جاڭا ءومىر باستالىپ، قازاق ءتىلىن بىلۋگە دەگەن قىزىعۋشىلىعىم ارتىپ بار ىنتاممەن وقىپ ۇيرەنە باستادىم، - دەدى ۆلاديسلاۆ تەن.
قازاققا دەگەن كوڭىلى مەن ىقىلاسى ايرىقشا ازاماتتىڭ بولمىسى دا، ارمان-ماقساتى دا ەرەكشە.
- ماعان تەك قانا ءتىل ەمەس، جالپى قازاق حالقىنىڭ ءوزى، سالت-ءداستۇرى ۇناي باستادى، ماقالدارىن تۇسىنە باستادىم. سودان وزىمە: "نەگە مەن قازاق ءتىلىن دامىتۋ ءۇشىن وسىنشا جانىمدى بەرىپ جۇمىس جاساپ جاتىرمىن؟"- دەپ سۇراق قويدىم. سول سۇراعىما ءوزىم جاۋاپ تاپقان سياقتىمىن. مەنىڭ ويىمشا، اللا تاعالا مەنى قازاقستانعا اتا-بابالارىمنىڭ اتىنان العىس ايتۋ ءۇشىن جىبەرگەن سياقتى. سول قيىن كەزدە مەنىڭ اتا-باباما كومەك بەرگەن قازاق حالقىنا دەگەن قۇرمەتىمدى ارقاشان دا العا قويامىن.
قازاق حالقىنىڭ ەڭ جاقسى قاسيەتتەرىنىڭ ءبىرى بۇل وسى جەردە تۇرىپ جاتقان ءاربىر حالىقتى قۇرمەتتەي بىلەدى. مىسالى، ءبىزدى، كورەي حالقىن، ۇنەمى “ەڭبەككور “دەپ اتايدى. بۇل ءبىزدى جوعارى باعالاي بىلگەنى دەپ ەسەپتەپ، ءارى قاراي قازاق جەرى ءۇشىن، ونىڭ جان-جاقتى دامۋىنا جان اياماي، ەڭبەك ەتۋگە دايىنمىن.
سوندىقتان ءوز باسىم قازىر قازاق ءتىلىن دامىتۋدا جۇمىس ىستەي باستادىم. ال مەنىڭ ماقساتىم جانە ارمانىم قازاقستانداعى بارلىق ادامداردىڭ قازاقشا ەركىن سويلەي ءبىلۋى! - دەپ ويىن تۇيىندەدى ءتىل جاناشىرى.
“ادىرنا” ۇلتتىق پورتالى ۆلاديسلاۆ تەننىڭ قازاق قوعامىنداعى انا ءتىلىن بىلمەيتىندەرگە قاتىستى پىكىرىن ۇسىنادى. ونىڭ پايىمداۋىنشا، قازاق ءتىلىنىڭ وركەندەۋىنە قوعامداعى ءاربىر ازامات پەن بالا تاربيلەپ وتىرعان اتا-انا جاۋاپتى.
“ادىرنا” ۇلتتىق پورتالى
