Qazaq elinde ómir súrip jatqan etnıkalyq káris azamaty Vladıslav Ten qazaq tiline degen qyzyǵýshylyǵynyń qalaı oıanǵanyn aıtyp, jan tebirenter jazba jarııalady. Káris azamatynyń aıtýynsha, qazaq halqynyń shapaǵatyn kórgen ózge etnos ókilderi óte kóp. Avtordyń basty armany da Qazaq eliniń árbir azamatyn qazaqsha erkin sóıleıtin deńgeıge jetkizý, dep habarlaıdy “Adyrna” ulttyq portaly.
Avtor óz sóziniń kirispesinde tereń tarıhty tolǵady:
- Bizdiń ata-babalarymyz 1937 jyly deportaııaǵa ushyrap Qazaq jerine eriksiz kelip túskende qazaqtar olarmen sońǵy nanyn bólisip, ajaldan qutqaryp, kómek bergeni úshin koreı halqynan alǵys bildiremin.
Sol kezde qazaq halqy ata-babalarymyzǵa qol ushyn bermegende meniń ózim de, meniń eki balalarym da, meniń kóptegen týys-týystarym da bul dúnıege kelmes edik jáne osy alǵysymdy dál qazir jazyp otyrmas edim. Qazaq jeri koreıler úshin kıeli ári qasıetti jer bolyp tabylady.
Men Tashkent qalasynda týǵanmyn. Meniń Otanym, týǵan jerim - Ózbekstan. Áke-sheshem men týǵan qaryndasym menen buryn Qazaqstanǵa qonys aýdarǵan edi. Degenmen ata-anamnyń jalǵyz uly bolǵannan keıin koreı mádenıetin saqtaý úshin olarmen birge ómir súrýim kerek ekenin men de, olar da bilip, bir kúni olardyń "Balam, sen Astanaǵa kep osy jerde birge turaıyq!" degen shaqyrýymen osy jerge kelip men úshin jańa ómir bastalyp, qazaq tilin bilýge degen qyzyǵýshylyǵym artyp bar yntammen oqyp úırene bastadym, - dedi Vladıslav Ten.
Qazaqqa degen kóńili men yqylasy aıryqsha azamattyń bolmysy da, arman-maqsaty da erekshe.
- Maǵan tek qana til emes, jalpy qazaq halqynyń ózi, salt-dástúri unaı bastady, maqaldaryn túsine bastadym. Sodan ózime: "Nege men qazaq tilin damytý úshin osynsha janymdy berip jumys jasap jatyrmyn?"- dep suraq qoıdym. Sol suraǵyma ózim jaýap tapqan sııaqtymyn. Meniń oıymsha, Alla taǵala meni Qazaqstanǵa ata-babalarymnyń atynan alǵys aıtý úshin jibergen sııaqty. Sol qıyn kezde meniń ata-babama kómek bergen qazaq halqyna degen qurmetimdi árqashan da alǵa qoıamyn.
Qazaq halqynyń eń jaqsy qasıetteriniń biri bul osy jerde turyp jatqan árbir halyqty qurmetteı biledi. Mysaly, bizdi, koreı halqyn, únemi “eńbekkor “dep ataıdy. Bul bizdi joǵary baǵalaı bilgeni dep eseptep, ári qaraı Qazaq jeri úshin, onyń jan-jaqty damýyna jan aıamaı, eńbek etýge daıynmyn.
Sondyqtan óz basym qazir qazaq tilin damytýda jumys isteı bastadym. Al meniń maqsatym jáne armanym Qazaqstandaǵy barlyq adamdardyń qazaqsha erkin sóıleı bilýi! - dep oıyn túıindedi til janashyry.
“Adyrna” ulttyq portaly Vladıslav Tenniń qazaq qoǵamyndaǵy ana tilin bilmeıtinderge qatysty pikirin usynady. Onyń paıymdaýynsha, qazaq tiliniń órkendeýine qoǵamdaǵy árbir azamat pen bala tárbılep otyrǵan ata-ana jaýapty.
“Adyrna” ulttyq portaly
