قازاقستان قۇراماسىنىڭ باس باپكەرى، رەسەيلىك مامان ستانيسلاۆ چەرچەسوۆ قازاق ءتىلى تۋرالى ايتىپ، سىنعا ۇشىرعان سوزىنە قاتىستى پىكىر ءبىلدىردى. بۇل تۋرالى Sports.ru پورتالى جاريالاندى، دەپ حابارلايدى “ادىرنا” ۇلتتىق پورتالى.
ەسكە سالساق، سلوۆەنيامەن وتكەن ۇلتتار ليگاسىنىڭ ماتچىنان (0:1) كەيىن قازاقستان قۇراماسىنىڭ باس باپكەرى، رەسەيلىك مامان ستانيسلاۆ چەرچەسوۆ قازاق تىلىندە سۇراق قويعان «پسج» جەيدەسىن كيگەن جۋرناليستكە: «سەن قازىر فرانتسۋزشا سويلەپ تۇرسىڭ با؟» دەگەن ەدى. وسى سوزدەن كەيىن ول قازاقستاندا تىلگە قۇرمەتسىزدىك كورسەتتى دەپ سىنعا ۇشىرادى.
كەيىن چەرچەسوۆ بۇل جاعدايعا تۇسىنىكتەمە بەردى.
"مۇلدەم ەشتەڭە بولمادى. شىنىمەن. ايتقانىم شىندىق. بۇل ماسەلەنى وسىلاي ورشىتۋگە ەشقانداي نەگىز بولعان جوق. ەشكىمگە (جۋرناليستكە) رەنجىمەدىم، ەشنارسە جامان ايتپادىم. ءوز جۇمىسىمدى جاساپ ءجۇرمىن. وزىمە دە قالجىڭ ايتا بەرەمىن، كورىپ تۇرعانىڭىزداي.
جۋرناليست «پسج» فورماسىن كيىپ، ماتچقا كەلىپ، ءبىرىنشى سۇراق قويدى. مەن ونىمەن ازىلدەسىپ سويلەستىم. ەگەر ءازىلدى تۇسىنبەسە، دەمەك، مەنىڭ قاتەلىگىم. بىراق كەشىرىم سۇراۋدىڭ ءمانى جوق، ويتكەنى ەشتەڭە جاساعان جوقپىن. ءتىپتى ودان ورنىنان تۇرىپ، اينالۋىن ءوتىندىم، ادامدار نە ايتقانىمىزدى ءتۇسىنۋى ءۇشىن”، – دەدى چەرچەسوۆ.
قازاقستان فۋتبول فەدەراتسياسى بۇل ارەكەتى ءۇشىن چەرچەسوۆقا 738 400 تەڭگە كولەمىندە ايىپپۇل سالعان بولاتىن.
