جاستاردىڭ جۇمىسسىزدىق، جالقاۋلىق سياقتى كەلەڭسىز ارەكەتتەرى اقساقالدارعا كەرى اسەرىن تيگىزىپ وتىر. بۇل تۋرالى پىكىردى قازاق تاعامتانۋ اكادەمياسىنىڭ پرەزيدەنتى، عالىم تورەگەلدى شارمانوۆ Facebook پاراقشاسىنا جاريالادى، دەپ حابارلايدى “ادىرنا” ۇلتتىق پورتالى.
“قازىرگى قازاق اۋىلدارىندا اعايىن اراسىنداعى ىمىراگەرشىلىكتى ساقتاپ، جۇرتىن ايرانداي ۇيىتىپ وتىرعان اقساقالدار بار، ارينە. بىراق ومىردە مۇقتاجدىق، جەتىسپەۋشىلىك باسىم بولىپ تۇر. وتباسىندا جاستاردىڭ جۇمىسسىزدىق، جالقاۋلىق سياقتى كەلەڭسىز ارەكەتتەرى اقساقالدارعا كەرى اسەرىن تيگىزىپ وتىر. سونىڭ سالدارىنان اۋىلدىق جەرلەردەگى ەرەسەكتەردىڭ اقساقالدىققا مۇرشاسى كەلمەي تۇر. ۇلكەنگە سالەم بەرىپ، ولاردان اقىل سۇراپ، ايتقانىن تىڭداعاننان جاستار ۇتىلمايدى.
ستۋدەنت كەزىمىزدە اۋىلعا بارعاندا اقساقالدارعا ارنايى سالەم بەرىپ، اڭگىمەلەرىن تىڭداۋدىڭ ءوزى ءبىر كەرەمەت ەدى. اتالارىمىز جول نۇسقاپ تۇراتىن. وسى ءۇردىس قازىر جويىلىپ بارادى. جالپى قوعامدا اقساقالدىقتىڭ كورىنىسى ازايىپ كەتتى. ەرتەرەكتە ءبىر قارت انانىڭ لاۋازىمدى قىزمەتتە جۇرگەن بالاسى جۇمىسقا كەتەردە اناسىمەن قوشتاسىپ، ۇيگە كىرگەندە مىندەتتى تۇردە سالەمدەسەدى ەكەن. ءبىر كۇنى قىزمەتتە قيىندىقتار تۋسا كەرەك، دۇرىس امانداسپاي قالعان بالاسىنا اناسى نالىپ: «بۇل جالعاندا بالاڭ ءوزىڭدى مەنسىنبەي كەتكەننەن ارتىق قاسىرەت جوق ەكەن» دەپتى. كۇندەلىكتى كۇيكى تىرلىكتىڭ قامىمەن جۇرگەن ادامداردىڭ اتا-اناسىنا كوڭىل بولۋگە ورەسى جەتپەيدى. بۇعان قوسا ءسوزىن تىڭداتا الاتىن ۇلكەندەر دە از”،- دەپ جازدى ول.
