قوعامنىڭ ورنىقتى دامۋى مەن ازاماتتاردىڭ قاۋىپسىز ءارى تۇراقتى ءومىر ءسۇرۋى ەڭ الدىمەن زاڭ ۇستەمدىگىنە، قوعامدىق ءتارتىپتىڭ ساقتالۋىنا جانە ءاربىر ازاماتتىڭ جاۋاپكەرشىلىك ۇستانىمىنا تىكەلەي بايلانىستى. قۇقىقتىق مادەنيەتى جوعارى، سانالى ءارى بەلسەندى جاستار – ادىلەتتى قوعامنىڭ باستى تىرەگى. وسى ماقساتتا قازاقستان رەسپۋبليكاسىنىڭ جاڭا كونستيتۋتسياسىن ىلگەرىلەتۋ اياسىندا «Legal Talk: اشىق ميكروفون» فورماتىنداعى جاستار فورۋمى ۇيىمداستىرىلدى.
اتالعان فورۋم جاستار مەن مەملەكەتتىك ورگاندار اراسىندا اشىق ديالوگ ورناتۋعا، قۇقىقتىق ساۋاتتىلىقتى ارتتىرۋعا جانە قوعامداعى وزەكتى قۇقىقتىق ماسەلەلەردى بىرلەسىپ تالقىلاۋعا باعىتتالعان ماڭىزدى الاڭعا اينالدى.
فورۋمنىڭ باستى ەرەكشەلىگى – اشىق ميكروفون فورماتى بولدى. بۇل فورمات قاتىسۋشىلارعا ءوز ويلارىن ەركىن جەتكىزۋگە، كوكەيىندەگى سۇراقتارىن تىكەلەي سالا ماماندارىنا قويۋعا جانە ناقتى ءارى تۇسىنىكتى جاۋاپ الۋعا مۇمكىندىك بەردى. ءىس-شارا بارىسىندا زاڭ مەن ءتارتىپ، قوعامدىق قاۋىپسىزدىك، جاستاردىڭ قۇقىقتارى مەن مىندەتتەرى، ينتەرنەت كەڭىستىگىندەگى قاۋىپتەر جانە قۇقىق بۇزۋشىلىقتاردىڭ الدىن الۋ ماسەلەلەرى كەڭىنەن تالقىلاندى.
فورۋمعا جەتىسۋ وبلىسىنىڭ پروكۋرورى ب. جۇماقانوۆ، جەتىسۋ وبلىسى اكىمىنىڭ ورىنباسارى م. كولباەۆ، جەتىسۋ وبلىسى پوليتسيا دەپارتامەنتىنىڭ باسشىسى س. قۇسايىنوۆ، جەتىسۋ وبلىسىنىڭ ادىلەت دەپارتامەنتىنىڭ باسشىسى ج. بەكسۇلتان، جەتىسۋ وبلىسىنىڭ ەكونوميكالىق تەرگەپ-تەكسەرۋ دەپارتامەنتى باسشىسىنىڭ ورىنباسارى م. قۇربانوۆ قاتىستى.
سالا ماماندارى جاستارمەن ەركىن پىكىر الماسىپ، ءوز تاجىريبەلەرىمەن ءبولىسىپ، قۇقىقتىق مادەنيەتتى قالىپتاستىرۋدىڭ نەگىزگى باعىتتارىنا توقتالدى. بۇل ءوز كەزەگىندە جاستاردىڭ قۇقىقتىق ماسەلەلەرگە قىزىعۋشىلىعىن ارتتىرىپ، تاقىرىپتى جەڭىل ءارى تۇسىنىكتى فورماتتا قابىلداۋىنا ىقپال ەتتى.
اتالعان فورۋمعا 200-گە جۋىق جاس قاتىستى. ءىس-شارا جاستاردىڭ ازاماتتىق ۇستانىمىن نىعايتۋعا، زاڭعا قۇرمەتپەن قاراۋ مادەنيەتىن قالىپتاستىرۋعا جانە قوعامدىق ءتارتىپتى كۇشەيتۋگە باعىتتالعان جۇيەلى جۇمىستاردىڭ ماڭىزدى ءبىر بولىگى بولدى. فورۋم پىكىر الماسۋ الاڭى عانا ەمەس، جاۋاپتى ءارى سانالى قوعام قالىپتاستىرۋ جولىنداعى ناقتى قادام رەتىندە باعالاندى.
