Jastardyń jumyssyzdyq, jalqaýlyǵy aqsaqaldarǵa keri áserin tıgizip otyr - Tóregeldi Sharmanov

3115
Adyrna.kz Telegram

Jastardyń jumyssyzdyq, jalqaýlyq sııaqty keleńsiz áreketteri aqsaqaldarǵa keri áserin tıgizip otyr. Bul týraly pikirdi Qazaq taǵamtaný akademııasynyń prezıdenti, ǵalym Tóregeldi Sharmanov Facebook paraqshasyna jarııalady, dep habarlaıdy “Adyrna” ulttyq portaly. 

“Qazirgi qazaq aýyldarynda aǵaıyn arasyndaǵy ymyragershilikti saqtap, jurtyn aırandaı uıytyp otyrǵan aqsaqaldar bar, árıne. Biraq ómirde muqtajdyq, jetispeýshilik basym bolyp tur. Otbasynda jastardyń jumyssyzdyq, jalqaýlyq sııaqty keleńsiz áreketteri aqsaqaldarǵa keri áserin tıgizip otyr. Sonyń saldarynan aýyldyq jerlerdegi eresekterdiń aqsaqaldyqqa murshasy kelmeı tur. Úlkenge sálem berip, olardan aqyl surap, aıtqanyn tyńdaǵannan jastar utylmaıdy.

Stýdent kezimizde aýylǵa barǵanda aqsaqaldarǵa arnaıy sálem berip, áńgimelerin tyńdaýdyń ózi bir keremet edi. Atalarymyz jol nusqap turatyn. Osy úrdis qazir joıylyp barady. Jalpy qoǵamda aqsaqaldyqtyń kórinisi azaıyp ketti. Erterekte bir qart ananyń laýazymdy qyzmette júrgen balasy jumysqa keterde anasymen qoshtasyp, úıge kirgende mindetti túrde sálemdesedi eken. Bir kúni qyzmette qıyndyqtar týsa kerek, durys amandaspaı qalǵan balasyna anasy nalyp: «Bul jalǵanda balań ózińdi mensinbeı ketkennen artyq qasiret joq eken» depti. Kúndelikti kúıki tirliktiń qamymen júrgen adamdardyń ata-anasyna kóńil bólýge óresi jetpeıdi. Buǵan qosa sózin tyńdata alatyn úlkender de az”,- dep jazdy ol.

Pikirler