ۇلتتىق مەرەكە - رەسپۋبليكا كۇنىندە قىزىلوردالىقتارعا ايرىقشا تارتۋ جاسالدى. ءبىر مەزەتتە بىرنەشە الەۋمەتتىك نىسان پايدالانۋعا بەرىلىپ، بالالارعا قۋانىش سىيلايتىن جاڭا سپورت-ويىن الاڭدارى اشىلدى.
وبلىس اكىمى نۇرلىبەك نالىباەۆ ايماق تۇرعىندارىن ۇلىق مەرەكەمەن قۇتتىقتاپ، يگى تىلەگىن ارنادى.
- بارشا جەرلەستەرىمدى قايتا ورالعان ۇلتتىق مەرەكەمىز - رەسپۋبليكا كۇنىمەن شىن جۇرەكتەن قۇتتىقتايمىن! اراعا 13 جىل سالىپ، پرەزيدەنتىمىزدىڭ جارلىعىمەن رەسپۋبليكا كۇنى ۇلتتىق مەرەكە بولىپ حالىقپەن قايتا قاۋىشتى. بۇل تاريحي ءمانى جوعارى، يدەولوگيالىق سالماعى ەرەك ايتۋلى كۇن ەلىمىزدىڭ بۇگىنى مەن ەرتەڭىنە ادال قىزمەت ەتەتىن، ەرەن ىستەر مەن ەلەۋلى باستامالاردى جالعاستىراتىن بارشا ازامات ءۇشىن ماڭىزدى،-دەدى ن.نالىباەۆ.
مەرەيلى مەرەكەدە قوعامدىق كولىكتەر قاتارى جاڭا 40 اۆتوبۋسپەن تولىقتى. بۇعان دەيىن قىزىلوردا اۆتوبۋس پاركىنە «ونەركاسىپتى دامىتۋ قورى» اق-ى ارقىلى جاڭادان ليزينگكە 150 دانا اۆتوبۋس الۋعا 1,43 ملرد. تەڭگە قارجى بولىنگەن. سونىڭ اياسىندا وتكەن ايدا 21 جاڭا اۆتوبۋس الىندى. ال، قاراشا ايىندا قالعان جاڭا كولىكتەر كەلەتىن بولادى.
وڭىردە وبلىس اكىمىنىڭ باستاماسىمەن "بالالار جىلىنا" ارنالعان دەمەۋشىلەردىڭ قولداۋىمەن قۇنى 1,6 ملرد.تەڭگەنى قۇرايتىن قالا، اۋدان ىشىندە 80 سپورت-ويىن الاڭى ءبىر مەزەتتە تارتۋ ەتىلدى.
ۇلتتىق مەرەكە - رەسپۋبليكا كۇنى قارساڭىندا تۋعان جەرگە جاناشىر مەتسەناتتىڭ قارجىسى ەسەبىنەن جاڭاقورعان اۋدانىندا قۇنى 790 ملن. تەڭگەنى قۇرايتىن زاماناۋي دەمالىس پاركى اشىلدى. ال، سىرداريا اۋدانىنىڭ ناعي ءىلياسوۆ اۋىلىندا 350 ملن.تەڭگەگە "ەڭبەكشىلەر اللەياسى" بوي كوتەردى.
ايماقتا ءبىلىم سالاسىنىڭ دامۋىنا تىلەۋلەس مەتسەنات ازاماتتاردىڭ مەكتەپ، بالاباقشا اشۋ ىسىنە ىنتاسى جوعارى. رەسپۋبليكا كۇنىندە 300 ورىندىق جاڭا بالاباقشا ەسىگىن ايقارا اشتى. جىل سوڭىنا دەيىن تاعى 2 مەملەكەتتىك بالاباقشا پايدالانىلۋعا بەرىلەدى.
سوڭعى 5-6 ايدىڭ ىشىندە جەرگىلىكتى كاسىپكەرلەر 9 ملرد.تەڭگەگە قولداۋ كورسەتىپ، اۋقىمدى جوبالاردىڭ جۇزەگە اسۋىنا دانەكەر بولدى.
مەرەكە قۇرمەتىنە جالاعاش اۋدانىندا قۇنى 431 ملن. تەڭگەگە 200 ورىندىق وقۋشىلار ءۇيى مەن 50 ورىندىق ونەر مەكتەبى، جاڭا دارىگەرلىك امبۋلاتوريا پايدالانۋعا بەرىلدى. تەڭىزدى ولكە ارال اۋدانىندا 150 ملن. تەڭگەگە "بالىقشىلار مونۋمەنتى" مەن اللەيا ەل يگىلىگىنە بەرىلۋگە دايىن.
بيىل وڭىردە 4 جاڭا ءبىلىم وشاعى اشىلدى. جىل سوڭىنا دەيىن 8 مەكتەپ تابىستالادى. اپاتتى دەپ تانىلعان توقاباي اۋىلىنداعى مەكتەپ جەكە ينۆەستور ەسەبىنەن 500 ملن.تەڭگە قارجىعا سالىنۋدا. وقۋشىلاردى تاسىمالداۋ ءۇشىن وسى وقۋ جىلىندا مەكتەپتەرگە 30 اۆتوبۋس بەرىلەدى.
وبلىستا تۇرىك كومپانيالارىمەن بىرلەسكەن ىنتىماقتاستىق جاڭا دەڭگەيگە كوتەرىلدى. بيىل قالا اۋماعىن جىلۋ جانە ەلەكترمەن تولىق قامتاماسىز ەتەتىن قۋاتتىلىعى 240 مەگاۆاتتى قۇرايتىن جىلۋ ەلەكتر ورتالىعىنىڭ ىرگەتاسى قالاندى. قۇنى 215 ملرد. تەڭگەدەن اساتىن جوبا 2025 جىلى اياقتالادى. تاعى ءبىر تۇرىك كومپانياسىمەن جىلىنا 24 مىڭ توننا قىزاناق پاستاسىن شىعاراتىن زاۋىت سالۋ تۋرالى كەلىسسوزدەر جۇرگىزىلۋدە.
سىر ەلىندە جاڭا 1,6 ملرد. تەڭگەنى قۇرايتىن نەكە سارايى، 3,7 ملرد. تەڭگەگە 1000 ورىندىق ونەر ورتالىعى، سول جاعالاۋدىڭ بويىنان 2,7 ملرد. تەڭگەگە قان ورتالىعىنىڭ قۇرىلىسى جۇرۋدە. بەلگىلى كاسىپكەر، مەتسەنات مارات دۇيسەنباەۆتىڭ دەمەۋشىلىگىمەن قۇرىلىسى باستالعان قۇنى 1,5 ملرد. تەڭگەنى قۇرايتىن «اناعا تاعزىم» ورتالىعى شاھاردىڭ اجارىن اشا تۇسەدى.
وڭىردە سالىنعان شىنى زاۋىتىنىڭ كۇيدىرۋ پەشى قاجەتتى تەمپەراتۋراسىنا جەتىپ، قازان ايىنىڭ 9 كۇنى العاشقى سىناما شىنى ءونىمى ءوندىرىلدى. زاۋىت اينالاسىنان 8 ىلەسپە ءوندىرىس داميدى. زاۋىتتا شىنى-تالشىقتى، كومپوزيتتىك ماتەريالدار جانە باسقا دا ونىمدەر شىعارىلا باستايدى.
قالانىڭ نەگىزگى قاقپاسى اۋەجاي دا قايتا جاڭارادى. بولات وتەمۇراتوۆتىڭ تىكەلەي قولداۋىمەن قۇنى 12 ملرد. تەڭگە بولاتىن "قورقىت اتا" اۋەجايىنىڭ جاڭا تەرمينالى سالىنۋدا. قازىردىڭ وزىندە وزگە دە دەمەۋشىلەرمەن 100 ملن.تەڭگەگە بۇرىنعى تەرمينالدىڭ ىشكى جانە سىرتقى ارلەۋ جۇمىستارى جۇرگىزىلدى.
بالالار ءۇشىن تاعى ءبىر قوماقتى سىي - قىزىلوردا قالاسىندا زاماناۋي ۇلگىدەگى «وقۋشىلار سارايى» بوي كوتەرەدى.
الداعى 3 جىلدا ايماقتا "جايلى مەكتەپ" جوباسى اياسىندا قۇنى 70 ملرد. تەڭگەگە 15 مەملەكەتتىك مەكتەپتىڭ قۇرىلىسىن سالۋ جوسپارلانعان. ونىڭ ىشىندە 19,6 ملرد. تەڭگەگە كەلەر جىلى 9 ءبىلىم وشاعىنىڭ قۇرىلىسى باستالادى.
دەنساۋلىق ساقتاۋ سالاسىندا 2 جىل ىشىندە 27 جاڭا نىسان حالىق يگىلىگىنە بەرىلەدى. ورتالىق اتقارۋشى ورگاندارمەن بىرگە جاسالعان ورنىقتى جۇمىستاردىڭ ناتيجەسىندە 36,4 ملرد. تەڭگەگە قىزىلوردا قالاسىنان كوپسالالى اۋرۋحانا مەن ەمحانا تۇرعىنداردىڭ يگىلىگىنە قىزمەت ەتەتىن بولادى.
ايماقتا رەسپۋبليكا كۇنى سالتاناتتى جيىنمەن قورىتىندىلانادى. وبلىستىڭ الەۋمەتتىك-ەكونوميكالىق دامۋىنا ەرەكشە ۇلەس قوسقان ازاماتتار مەملەكەتتىك ناگرادامەن ماراپاتتالادى.
©قىزىلوردا وبلىسى اكىمىنىڭ ءباسپاسوز قىزمەتى
"ادىرنا" ۇلتتىق پورتالى
