رەسەيدەگى قىرىم كوپىرىندە جارىلىس بولدى، دەپ حابارلايدى “ادىرنا” ۇلتتىق پورتالى ريا نوۆوستيگە سىلتەمە جاساپ.
جانارماي تسيستەرناسىنىڭ جارىلۋىنا بايلانىستى ۆاگوندار مەن پويىزدار قوزعالىسى توقتادى. جەلىدە جاريالانعان سۋرەتتەردەن ءورتتىڭ تەمىرجول بويىندا بولعانىن كورۋگە بولادى
الدىن الا مالىمەت بويىنشا، 8 قازان كۇنى ساعات 06:00 شاماسىندا تامان-كەرچ باعىتىندا كەلە جاتقان جۇك پويىزىنىڭ ۆاگوندارىنىڭ ءبىرى ورتەنگەن. كەيىن ءورت باسقا تسيستەرنالارعا تاراعان.
وقيعا ورنىندا جول قىزمەتى مەن توتەنشە جاعدايلار مينيسترلىگى جۇمىس ىستەپ جاتىر. ازىرگە زارداپ شەككەندەر تۋرالى اقپارات جوق.
اپات سالدارىنان كوپىردىڭ اۆتوكولىك بولىگىنىڭ ارالىعى وپىرىلىپ تۇسكەن.
رەسەيلىك باق كەرچ قالاسىندا قىرىم كوپىرىنە جەتە المايتىن كولىكتەردىڭ جۇرگىزۋشىلەرى مەن جولاۋشىلارىنا سۋى مەن دارەتحاناسى بار اۆتوتۇراق ۇيىمداستىرىلعانىن جازادى،
ايماق بيلىگى جەڭىل كولىكتەر ءۇشىن پاروم وتكەلىن ۇيىمداستىرماق.
قىرىم كوپىرى رەسەيدەگى ەڭ ۇزىن كوپىر، ونىڭ ۇزىندىعى 19 شاقىرىم. اۆتوكولىك بولىگى 2018 جىلدىڭ مامىر ايىندا پايدالانۋعا بەرىلدى. ال 2019 جىلدىڭ جەلتوقسان ايىندا تەمىرجول ۋچاسكەسىنىڭ بويىمەن العاشقى پويىزدار لەگى وتكەن.
”ادىرنا” ۇلتتىق پورتالى
