قازاقستاننىڭ ءىرى قالالارىنا رەسەيدەن كەلۋشىلەر سانى كۇرت ءوسۋى مۇمكىن. بۇل پۋتين جاريالاعان جارتىلاي جۇمىلدىرۋمەن بايلانىستى بولماق، دەپ حابارلايدى “ادىرنا” ۇلتتىق پورتالى.
«اسكەري قىزمەتكە قازىرگى ۋاقىتتا زاپاستاعى جانە ەڭ الدىمەن قارۋلى كۇشتەر قاتارىندا اسكەري بورىشىن وتەگەن، بەلگىلى ءبىر اسكەري ماماندىقتارى جانە ءتيىستى تاجىريبەسى بار ازاماتتار عانا شاقىرىلادى. اسكەري قىزمەتكە شاقىرىلعاندار بولىمدەرگە جىبەرىلگەنگە دەيىن ارنايى اسكەري وپەراتسيا تاجىريبەسىن ەسكەرە وتىرىپ، مىندەتتى تۇردە قوسىمشا اسكەري دايىندىقتان وتەدى»، - دەدى رەسەي پرەزيدەنتى ۆلاديمير پۋتين تەلەارنا ارقىلى سويلەگەن سوزىندە.
“چينوۆنيك” تەلەگرام ارناسىنىڭ ايتۋىنشا، الماتى جانە باسقا دا ءىرى قالالاردا سۇرانىستىڭ ارتۋىنا بايلانىستى پاتەرلەردى جالعا الۋ باعاسىنىڭ تاعى دا ءوسۋى كۇتىلۋدە. قوناقۇيلەر، كولىك قىزمەتتەرى جانە قوعامدىق تاماقتانۋ ورىندارىنىڭ باعاسى قىمباتتاۋى مۇمكىن.
“قالاي بولعاندا دا، قازاقستاندىق ارنايى قىزمەت پەن پوليتسەيلەر قىراعى بولۋى كەرەك. حالىققا قىزمەت كورسەتۋ ورتالىقتارىنا جۇكتەمە ارتادى، بانك قىزمەتىنە سۇرانىس ارتادى.
ال جاعىمدى جاعى، ەڭبەك نارىعى جوعارى بىلىكتى كادرلارمەن، سونىڭ ىشىندە IT جانە قىزمەت كورسەتۋ سالاسىنا تولىعادى. جالپى، جاڭا كادرلاردىڭ كەلۋى ەسەبىنەن قالالاردىڭ باسەكەگە قابىلەتتىلىگىنىڭ ارتۋى كۇتىلىپ وتىر. ەندەشە، جەرگىلىكتى تۇرعىندار جاڭا شىندىقتان اداسىپ قالماي، ءبىر قادام الدا بولۋى كەرەك.
ايتپاقشى، كەشەدەن بەرى Google ىزدەۋ جۇيەسىنىڭ رەسەيلىك سەگمەنتىندە جۇمىلدىرۋ جانە ەلدەن كەتۋگە بايلانىستى سۇرانىستار كۇرت ءوستى”، - دەپ جازدى “چينوۆنيك” تەلەگرام ارناسى.
“ادىرنا” ۇلتتىق پورتالى
