اقش-تىڭ ۋكرايناداعى بۇرىنعى ەلشىسى بريدجيت برينك ءوز ەركىمەن قىزمەتىنەن كەتۋىنىڭ سەبەبىن ترامپ اكىمشىلىگىنىڭ رەسەيگە جاقتاس ساياساتىمەن بايلانىستىردى، دەپ حابارلايدى "ادىرنا" ۇلتتىق پورتالى.
بۇل تۋرالى ول Detroit Free Press باسىلىمىنا جازعان ماقالاسىندا مالىمدەدى.
«وكىنىشكە قاراي، ترامپ اكىمشىلىگىنىڭ ساياساتى باستان-اق جابىرلەنۋشىگە — ۋكرايناعا قىسىم جاساۋعا باعىتتالدى، ال اگرەسسور — رەسەيگە ەمەس. مۇنداي جاعدايدا ۇكىمەت ساياساتىن ار-ۇجدانمەن جۇرگىزە المايتىنىمدى ءتۇسىندىم، سوندىقتان قىزمەتتەن كەتۋ — مەنىڭ ازاماتتىق بورىشىم بولدى»، — دەدى ديپلومات.
برينك سونىمەن قاتار، رەسەيدىڭ ۋكرايناداعى ارەكەتتەرىن "تازا جاۋىزدىق" دەپ اتاپ، اقش بۇل سوعىستى قالاي جۇرگىزسە، سوعان قاراپ وداقتاستارى مەن قارسىلاستارى ەلدىڭ ۇستانىمىن باعالايتىنىن جەتكىزدى.
برينك ءوز ماقالاسىندا بەيبىتشىلىككە تەك باعىنۋ ارقىلى قول جەتكىزۋ ارەكەتىن سىنعا الدى. ول مۇنداي «ىمىراشىلدىق» ساياساتتىڭ 1930 جىلدارى فرانتسيا مەن ۇلىبريتانيانىڭ ناتسيستىك گەرمانياعا جاساعان جەڭىلدىكتەرىمەن پاراللەل كەلەتىنىن اتاپ ءوتتى. «بەيبىتشىلىك ءۇشىن بارىنە كونۋ — بۇل قاۋىپسىزدىك ەمەس. بۇل – جاڭا سوعىستار مەن قاسىرەتكە جول»، — دەدى ول.
بريدجيت برينك ديپلوماتيالىق قىزمەتتە 30 جىلعا جۋىق ەڭبەك ەتكەن. ول بۇعان دەيىن سلوۆاكيا، وزبەكستان جانە گرۋزيادا قىزمەت اتقارىپ، شىعىس ەۋروپا مەن كاۆكاز وڭىرلەرى بويىنشا مامان رەتىندە تانىلعان. 2022 جىلى كوكتەمدە ۋكرايناداعى ەلشىلىككە تاعايىندالعان ول اسكەري كومەك كورسەتۋگە بەلسەندى قولداۋ ءبىلدىرىپ كەلگەن.
اقش-تىڭ قازاقستانداعى ەلشىسى بولعان دەنيەل روزەنبليۋم دە 2025 جىلعى 20 قاڭتاردا ءوز قىزمەتىن اياقتاپ، اقش مەملەكەتتىك دەپارتامەنتىندەگى 28 جىلعا جۋىق مانسابىن تامامداعان بولاتىن. ءدال وسى كۇنى دونالد ترامپ ومىرىندە ەكىنشى رەت اقش پرەزيدەنتى قىزمەتىنە كىرىسكەن.
ۇقساس جاڭالىقتار
