اتى وماقاسا قۇلاسا دا، مارەگە جۇگەنىن الا جۇگىرگەن شاباندوز بالا كوپشىلىكتى ءتاتى ەتتى. ەرەكشە وقيعا 23 قىركۇيەك كۇنى قارقارالى اۋدانى، ەڭبەك (تاتان) اۋىلىندا بولعان، دەپ جازادى "ادىرنا" ۇلتتىق پورتالى.
اۋىل مەشىتتىڭ بوي كوتەرۋىنە وراي وتكەن بايگەدە جۇگەنىن جۇلقا جۇگىرگەن شاباندوز بالا قالىڭ كوپشىلىكتىڭ كوزايىمىنا اينالدى. سايگۇلىگى سۇرىنسە دە، 30 شاقىرىمدىق الاماننىڭ جۇلدەسىن قانجىلاعان بالانىڭ ماڭدايىنان ءوبىپ، باتاسىن بەرىپ، تىلەكتەستىك تانىتىپ جاتقاندار كوپ.
View this post on Instagram
اسەرلى وقيعانىڭ كۋاسى بولعان اقىن جانات جاڭقاشۇلى:
"جيىلعان جۇرتتىڭ اۋزىنداعى ءسوز جۇگەن سۇيرەپ وتكەن بالا بولدى. كومبەگە دەيىن ءبىرىنشى كەلگەن ات وپات بولىپ، شاباندوزى مەن تۇل جۇگەن ەكىنشى بولىپ ءوتتى. ماراپاتتاۋ ساتىندە حالىق اراسىنان بالانىڭ قولىنا جۇلدەنىڭ ءبىر ميلليونىنان بولەك، حالىقتىڭ بەرگەن باتاسى ءھام ەلدەن شىققان ەرلەردىڭ تاعى دا اقشالاي سىيلىعى جانە اناسى ەكەۋىنە دۋبايعا تۋر بيلەت تاپسىرىلدى", - دەپ جازدى ءوز پاراقشاسىندا.
"قازاقتىڭ يگى جاقسىلارى اۋىلدان شىققان عوي. اۋىلدارىڭىز امان بولسىن!", "بالانىڭ جىگەرىن جاسىتپاي، جىگەرلەندىرىپ جىبەرگەندەرىڭ دۇرىس بولعان ەكەن. ەلدىك! ازاماتتىق!", "كىشكەنتاي عانا جۇرەگىڭنەن اينالدىم..." دەپ ءسۇيسىندى وقىرماندار.
"ادىرنا" ءجۋرناليسى جۇگەنمەن جۇگىرگەن شاباندوزعا قاتىستى دەرەكتەردى انىقتاپ كوردى. شاباندوز - 11 جاسار نۇراحانوۆ ارنات مۇراتحانۇلى، جامبىل وبلىسى، تۇرار رىسقۇلوۆ اۋدانى، كوكدونەن اۋىلىنىڭ پەرزەنتى. اۋىلداستارىنىڭ ايتۋىنشا، شاعىن كەلگەن شىمىر دەنەلى، تاقىمى مىعىم ارناتقا اۋىلداعى اتبەگىلەردىڭ بىردەن كوزى ءتۇسىپ، بايگە اتتارىنىڭ تىزىگىنىن سەنىپ تاپسىرعان.
"ادىرنا" ۇلتتىق پورتالى
