قازاقستان ۇلتتىق قۇراماسىنىڭ ۇزدىك بوكسشىلارىنىڭ ءبىرى ساكەن بيبوسىنوۆ رەسەيدىڭ حاباروۆسك قالاسىندا وتكەن كونستانتين كوروتكوۆتى ەسكە الۋعا ارنالعان حالىقارالىق تۋرنيردە التىن جۇلدەگە يە بولدى، دەپ حابارلايدى “ادىرنا” ۇلتتىق پورتالى.
بۇل — قازاقستان قۇراماسىنىڭ اتالمىش تۋرنيردەگى العاشقى “التىن” مەدالى.
54 كەلىگە دەيىنگى سالماق دارەجەسىندە سىنعا تۇسكەن بيبوسىنوۆ اقتىق سىندا رەسەيلىك دەنيس پالشينمەن قولعاپ ءتۇيىستىرىپ، ءۇش راۋندقا سوزىلعان تارتىستى جەكپە-جەكتە قازىلار القاسىنىڭ ءبىراۋىزدى شەشىمىمەن جەڭىسكە جەتتى. وسىلايشا ول جارىس چەمپيونى اتانىپ، قارسىلاسى كۇمىس جۇلدەمەن شەكتەلدى.
جارتىلاي فينالدا ساكەن وزبەكستان بوكسشىسى فاريوزبەك دۋسماتوۆتى 5:0 ەسەبىمەن سەنىمدى تۇردە ۇتتى. ايتا كەتەيىك، فاريوزبەك — ەكى دۇركىن وليمپيادا چەمپيونى حاسانبوي دۋسماتوۆتىڭ تۋعان ءىنىسى.
