يسلامبەك سالجانوۆ ۇلتتىق سپورت قاۋىمداستىعى پرەزيدەنتى بولدى

1756
Adyrna.kz Telegram
فوتو: inbusiness.kz
فوتو: inbusiness.kz

كاسىپكەر، «Altyn Qyran Foundation» قايىرىمدىلىق قورىنىڭ پرەزيدەنتى، مەتسەنات  يسلامبەك سالجانوۆ ۇلتتىق سپورت قاۋىمداستىعى پرەزيدەنتى بولدى. بۇل تۋرالى يسلامبەك سالجانوۆ الەۋمەتتىك جەلىدەگى پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.

«مادەنيەت جانە سپورت ءمينيسترى داۋرەن اباەۆتىڭ قاتىسۋىمەن ۇلتتىق سپورت قاۋىمداستىعى قۇرىلتايشىلارىنىڭ جالپى جينالىسى ءوتتى. قاۋىمداستىقتىڭ سوڭعى ءۇش جارىم جىلداعى جۇمىسى جايلى ەسەپ بەرىلىپ، جاڭا جارعىسى قابىلداندى. داۋىس بەرۋ ناتيجەسىندە قابىلدانعان تاعى ءبىر شەشىم – ۇلتتىق سپورت قاۋىمداستىعى پرەزيدەنتىن قايتا سايلاۋ»، - دەپ جازدى سالجانوۆ.

سونداي-اق، قاۋىمداستىق پرەزيدەنتى قىزمەتىنە ۇسىنعانى ءۇشىن قۇرىلتايشىلارعا العىس ءبىلدىردى.

قاۋىمداستىق پرەزيدەنتى قىزمەتىنە مەنى ۇسىنىپ، سەنىم ارتقاندارى ءۇشىن قۇرىلتايشىلارعا ريزاشىلىق بىلدىرەمىن. بۇل – قوعامدىق نەگىزدەگى، ارتار جۇگى مول، جاۋاپكەرشىلىگى زور جۇمىس، –  دەپ جازدى يسلامبەك سالجانوۆ.

ودان بولەك، باقداۋلەت ءسابيتوۆ پەن راۋان كەنجەحانۇلى قاۋىمداستىق پرەزيدەنتىنىڭ ورىنباسارى بولىپ سايلاندى.

«ۇلتتىق سپورت – حالىقتىڭ رۋحىن كوتەرىپ، بارشاعا ورتاق قۇندىلىقتاردى قالىپتاستىراتىن، وتانشىل جانە مەملەكەتشىل سانا-سەزىمدى كۇشەيتۋگە ىقپال ەتەتىن ماڭىزدى سالا. ونىڭ ستاتۋسى – مەملەكەتتىڭ ابىرويى. ءبىز ۇلتتىق سپورتتى دامىتۋعا كوڭىل ءبولۋ ارقىلى ەلدىك رۋح پەن بىرلىكتى كۇشەيتەمىز. مەملەكەتتىڭ حالىقارالىق بەدەلىن كوتەرەمىز»، - دەدى يسلامبەك سالجانوۆ.

ايتۋنىشا، ۇلتتىق سپورت ستاندارتتارىن بەكىتۋ جانە جاڭا فورمات ەنگىزۋ جوسپارلانىپ وتىر.

«ۇلتتىق ات سپورتىن مودەرنيزاتسيالاۋ ماقساتىندا «ۇلى دالا جورىعى» مارافون-بايگەسىنە جان-جاقتى قولداۋ كورسەتەمىز. بولاشاقتا ۇلتتىق سپورت جارىستارىنا تىكەلەي ترانسلياتسيا جاساۋدى جولعا قويۋ قاجەت. ودان بولەك، سپورتتىق ينفراقۇرىلىمدار سالۋ، وتاندىق ترەنەرلەر مەن سۋديالاردى دايىنداۋ، بالالار سپورتىن دامىتۋ سياقتى كوپتەگەن ماسەلەلەر بار»، - دەيدى ول.

”ادىرنا” ۇلتتىق پورتالى 

پىكىرلەر