مەملەكەت باسشىسىنىڭ جارلىعىمەن ەرلان ءابىلفايىزۇلى ىدىرىسوۆ ءۇش ەلدىڭ ەلشىلىك قىزمەتىنەن بوساتىلدى. بۇل تۋرالى اقوردا مالىمدەگەن ەدى. قازاق ءۇنى سايتى ەرلان ىدىرىسوۆ تۋرالى دەرەكتەرمەن ءبولىستى.
ەسكە سالا كەتەيىك، وسىدان 20 جىل بۇرىن، 2002 جىلى سول كەزدەگى سىرتقى ىستەر ءمينيسترى ەرلان ىدىرىسوۆ «ەگەر سىزدەر مەنىڭ ميىمدى اۋىستىرماساڭدار، قازاق ءتىلىن ۇيرەنا المايمىن» دەپ («ەسلي ۆى منە نە پومەنيايتە موي موزگي، منە كازاحسكي يازىك نە ۆىۋچيت!») دەپ پارلامەنتتە مالىمدەگەن بولاتىن.
سول كەزدەگى قالعىعان پارلامەنت بۇل ماسقاراعا دا ويانعان جوق - “قازاق تىلىنە ميىڭ جەتپەسە، قالاي قازاق ءمينيسترى بولاسىڭ؟”- دەپ ايتاتىن ءبىر دەپۋتات تابىلمادى. ويتكەنى، وزدەرىنىڭ دە جارتىسىنا جۋىعى مەملەكەتتىك تىلگە ميلارى جەتپەيتىندەر ەدى.
ايتپاقشى، مەملەكەتتىك تىلگە ميى جەتپەيتىندەر پارلامەنتتە دە، ۇكىمەتتە دە، پرەزيدەنت اكىشىلىگىندە دە، مينيسترلىكتەر مەن اكىمدىكتەردە تاۋەلسىزدىگىمىزگە 30 جىلدان اسسا دا، ءالى دە جەتكىلىكتى…
ياعني، مەملەكەتتىك تىلگە ميى جەتپەيتىن ءمينيستردى، بۇگىندە ەلشىنى ورنىنان الۋ 20 جىل كەشىگىپ شىقتى. “ەشتەن كەش جاقسى” دەيمىز بە، ادىلەتتىلىك ورناعانى ءۇشىن قر پرەزيدەنتى ق.توقاەۆقا راحمەت ايتامىز.
ەندى ۇزاعىنان ءسۇيىندىرىپ، مەملەكەتتىك ءتىلدى بىلمەيتىندەردى مەملەكەتتىك قىزمەتتەن بوساتۋدى جالعاستىرۋ كەرەك! ادىلەتتى قازاقستان ءۇشىن!
سونىمەن قاتار، بىلتىر قاراشا ايىندا قازاقستان پرەزيدەنتى قاسىم-جومارت توقاەۆ سىرتقى ىستەر مينيسترلىگىنىڭ كەڭەيتىلگەن القا وتىرىسىنا قاتىسىپ، ەلشىلەردىڭ ەڭ الدىمەن مەملەكەتتىك ءتىلدى ءبىلۋى كەرەكتىگىن ايتىپ، «قازاقستان اتىنان شەت مەملەكەتتەردە قىزمەت ىستەپ جۇرگەن ديپلوماتتارىمىز ەڭ الدىمەن مەملەكەتتىك ءتىلدى ءبىلۋى كەرەك» – دەپ، ناقتى تاپسىرعان ەدى.
“ادىرنا” ۇلتتىق پورتالى
