تۇركيا ازاماتى قازاق ءتىلىن ۇيرەنۋ ءۇشىن قازاقستانعا ارنايى كوشىپ كەلدى، دەپ حابارلايدى "ادىرنا" ۇلتتىق پورتالى Tengri.news-كە سىلتەپ.
كادريە يشىكلى – تۇركيا ازاماتى، ىستامبۇل قالاسىنىڭ تۇرعىنى، ءۇش بالانىڭ اناسى. قازىرگى ۋاقىتتا ول تۇركىستانداعى ق.ا. ياساۋي اتىنداعى ۋنيۆەرسيتەتتىڭ دايىندىق ورتالىعىنىڭ تىڭداۋشىسى. كادريە حانىم ۋنيۆەرسيتەت تاريحىنداعى ەڭ ۇلكەن جاستاعى ستۋدەنت بولىپ، جاستارعا ۇلگى.
كادريە يشىكلىنىڭ ايتۋىنشا، تۇركى حالىقتارىنىڭ ەلدەرى، مادەنيەتى جانە داستۇرلەرىنە دەگەن قىزىعۋشىلىعى ونى تۇركىستانعا ءبىلىم الۋعا جەتەلەگەن. قازاقستانعا كەلگەنىنە نەبارى ءبىر جارىم اي بولسا دا، ول قازىردىڭ وزىندە قازاق ءتىلىن ءتۇسىنۋ دەڭگەيىنە جەتكەن.
«قازىر قازاق ءتىلىن ۇيرەنىپ جاتىرمىن. تۇركى ەلدەرىنىڭ مادەنيەتىمەن تانىسقان ۇنايدى. مۇندا قازاق ءتىلىن مەڭگەرىپ، مادەنيەتىن تانىپ، كەيىن باۋىرلاس ەلدەردى ارالاعىم كەلەدى»، – دەيدى ول.
بۇعان دەيىن كادريە يشىكلى تۇركيادا «تۋريزم» ماماندىعى بويىنشا جوعارى ءبىلىم العان جانە الەمنىڭ 20-عا جۋىق ەلىن ارالاعان. ەندىگى ماقساتى – ورتالىق ازيانى زەرتتەۋ. وسىعان وراي، احمەت ياساۋي ۋنيۆەرسيتەتىندە «تۋريزم» ماماندىعى بويىنشا وقۋىن جالعاستىرۋدى جوسپارلاپ وتىر.
قازاقستانعا كەلگەن بويدا كادريە يشىكلى جاڭا ورتاعا تەز بەيىمدەلىپ، بارلىعىمەن وڭاي ءتىل تابىسقان. دايىندىق ورتالىعىنىڭ وقىتۋشىلارى ونىڭ بىلىمگە دەگەن اشىقتىعى مەن قازاق تىلىنە جوعارى قىزىعۋشىلىعىن ەرەكشە اتاپ وتۋدە.
كادريە يشىكلىنىڭ باتىل شەشىمى جاستاردى شابىتتاندىرىپ، ءبىلىم الۋعا ەشقاشان كەش ەمەس ەكەنىن دالەلدەدى.
