بۇگىن - ءشامشى قالداياقوۆتىڭ تۋعان كۇنى

1930
Adyrna.kz Telegram

بۇگىن، 15 تامىز – ۆالس پاتشاسى ءشامشى قالداياقوۆتىڭ تۋعان كۇنى. ءتىرى بولسا 92 جاسقا كەلەر ەدى.

قازاق دالاسىن انمەن تەربەتكەن سازگەر ءشامشى قالداياقوۆ 1930 جىلى 15 تامىزدا وڭتۇستىك قازاقستان وبلىسى، وتىرار اۋدانىندا دۇنيەگە كەلگەن. ونىڭ اندەرى قازاق ەلىنىڭ قاي وڭىرىندە دە ءجيى ايتىلىپ، انسۇيەر قاۋىم اراسىنا بارىنشا كەڭ تاراعان.

بالا كەزىنەن بويىنداعى بار تالانتىن القالى جيىن، الامان بايگەلەردە كورسەتە بىلگەن سازگەر 1950 جىلدان باستاپ شىعارماشىلىقپەن تۇبەگەيلى تۇردە شۇعىلداندى.

مۇحتار اۋەزوۆ ومىردەن وزار تۇسىندا ۋنيۆەرسيتەت ستۋدەنتتەرى الدىندا سويلەگەن سوزىندە ءشامشى سازدارىناقان، ءبىرجان ونەرپازدىعىنان كەيىنگى «جىل كەلگەندەي جاڭالىق» سەزىندىرەتىن ۇزدىك قۇبىلىس رەتىندە باعالاعانى ءمالىم. جۇرت اۋزىندا «بۇكىل قازاق ەلىنە ءان سالدىرعان ءشامشى» اتانۋىنىڭ سىرى دا وسى.

سازگەر اندەرى اسىرەسە، 1960-1970-ءشى جىلدارداعى جاستاردىڭ اۋزىندا ءجۇردى.  جاستى عانا ەمەس، ەرەسەك، ەگدە قاۋىمنىڭ دا، سان ءتۇرلى ماماندىق، الۋان ءتۇرلى ۇلىستىڭ دا كوڭىلىن باۋراپ الدى. حالىق اراسىندا اسىرەسە، كۇللى وتانشىلدىق، ەلشىلدىك نوتاسىن تاپ باسقان «مەنىڭ قازاقستانىم» تۋىندىسى ايرىقشا ءماشھۇر بولدى.

1986 جىلى جەلتوقسان كوتەرىلىسىنە قاتىسۋشى ۇل-قىزدار الماتى الاڭدارى مەن كوشەلەرىندە ءشامشىنىڭ وسى ءانىن ۇرانداي شىرقاپ شىقتى. 2005 جىلدان«مەنىڭ قازاقستانىم» تۋىندىسى قازاقستان رەسپۋبليكاسىنىڭ مەملەكەتتىك ءانۇرانى بولىپ بەكىتىلدى.

ش.قالداياقوۆ ۇلتتىق مۋزىكا ونەرىنىڭ ءان جانرىنا اسا ايقىن، سونى لەپ الا كەلگەن سازگەر رەتىندە كورىندى. كومپوزيتور شىعارمالارىنىڭ تاقىرىپتىق، مازمۇندىق اۋقىمى اسا كەڭ. ەلگە، جەرگە، وتانعا، اتا-اناعا، جارعا، دوس-جارانعا دەگەن سۇيىسپەنشىلىك – ءشامشى شىعارمالارىنىڭ باستى تاقىرىبى.

40 جىلدان استام شىعارماشىلىق قىزمەتىندە سازگەر 300-گە جۋىق مۋزىكالىق تۋىندى جازدى. كومپوزيتور 1965 جىلى قازاقستان كومسومول سىيلىعىن الدى. ال، 1991 جىلى وعان قازاقستان رەسپۋبليكاسىنىڭ حالىق ءارتىسى قۇرمەتتى اتاعى بەرىلدى.

”ادىرنا” ۇلتتىق پورتالى

پىكىرلەر