فوتو: Mike Blake/REUTERS
رەجيسسەرلەر Pavel Talankin مەن David Borenstein تۇسىرگەن Mr. Nobody Against Putin («ەشكىم مىرزا پۋتينگە قارسى» ) دەرەكتى ءفيلمى Academy Awards سىيلىعىنىڭ «ۇزدىك دەرەكتى فيلم» نوميناتسياسىن جەڭىپ الدى.
98-ءشى ماراپاتتاۋ ءراسىمى 15 ناۋرىز كۇنى اقش-تىڭ Los Angeles قالاسىنداعى Dolby Theatre تەاترىندا ءوتتى.
فيلم رەسەي مەكتەپتەرىندەگى اسكەري ناسيحاتتىڭ قالاي قالىپتاسقانىن كورسەتەدى. كارتينا اۆتورلارىنىڭ ايتۋىنشا، تۋىندى قوعامداعى وزگەرىستەردىڭ قاراپايىم ادامداردىڭ ارەكەتى ارقىلى قالاي قالىپتاساتىنىن باياندايدى.
رەجيسسەر دەۆيد بورەنشتەين ماراپاتتى قابىلداۋ كەزىندە بۇل فيلم ەلدى قالاي جوعالتىپ الۋعا بولاتىنى تۋرالى ەكەنىن ايتتى. ونىڭ سوزىنشە، كەيدە ەل تاعدىرى ادامداردىڭ ۇساق كورىنەتىن، بىراق ماڭىزدى شەشىمدەرى ارقىلى وزگەرۋى مۇمكىن. سونىمەن بىرگە ول ءتىپتى «ەشكىم» دەپ سانالاتىن ادامنىڭ ءوزى ۇلكەن وزگەرىسكە ىقپال ەتە الاتىنىن اتاپ ءوتتى.
ال پاۆەل تالانكين ساحنادان سويلەگەن سوزىندە بارلىق سوعىستاردى توقتاتۋعا شاقىردى.
ء«تورت جىلدان بەرى ءبىز جۇلدىزدى اسپانعا قاراپ ەڭ ماڭىزدى تىلەگىمىزدى ايتىپ كەلەمىز. وتە ماڭىزدى تىلەك. بىراق كەيبىر ەلدەردە جۇلدىزداردىڭ ورنىنا اسپاننان بومبالار ءتۇسىپ، دروندار ۇشادى. بولاشاعىمىز ءۇشىن، بارلىق بالالارىمىزدىڭ بولاشاعى ءۇشىن بارلىق سوعىستى توقتاتايىق. ءدال قازىر»، – دەدى ول.
كارتيناعا چەليابى وبلىسىنداعى كاراباش قالاسىنداعى مەكتەپتەردىڭ بىرىندە جۇمىس ىستەگەن پەداگوگ-ۇيىمداستىرۋشى پاۆەل تالانكين تۇسىرگەن بەينەجازبالار نەگىز بولعان. ول مەكتەپتەگى ءتۇرلى ءىس-شارالاردى، سالتاناتتى جيىنداردى، بايقاۋلاردى جانە اشىق ساباقتاردى تۇسىرۋگە جاۋاپتى بولعان.
بۇل جازبالار رەسەيدىڭ ۋكرايناعا قارسى كەڭ اۋقىمدى سوعىسى باستالعان 2022 جىلدىڭ اقپان ايىنان باستاپ تۇسىرىلگەن.
2024 جىلدىڭ جازىندا تالانكين ەكى جىل بويى جيناعان بەينەماتەريالدارىن الىپ، رەسەيدەن كەتىپ قالعان. كەيىن ول ءفيلمدى امەريكالىق رەجيسسەر دەۆيد بورەنشتەينمەن بىرگە مونتاجداپ، دەرەكتى كارتينا رەتىندە دايىنداعان.
ءفيلمنىڭ تۇساۋكەسەرى 2025 جىلعى 25 قاڭتاردا اقش-تا وتكەن Sundance Film Festival تاۋەلسىز كينوفەستيۆالىندە وتكەن بولاتىن. وندا تۋىندى قازىلار القاسىنىڭ ارنايى جۇلدەسىن يەلەنگەن،
سونداي-اق 22 اقپاندا لوندوندا وتكەن BAFTA Awards ماراپاتتاۋ راسىمىندە فيلم «ۇزدىك دەرەكتى فيلم» اتالىمىندا جەڭىسكە جەتتى. ماراپاتتى British Academy of Film and Television Arts تابىستاعان ەدى.
بۇعان دەيىن پاۆەل تالانكين شەتەلدىك باق-قا بەرگەن سۇحباتىندا سوعىس باستالعاننان كەيىن رەسەي مەكتەپتەرىندەگى اتموسفەرا مەن ريتوريكانىڭ ايتارلىقتاي وزگەرگەنىن ايتقان. ونىڭ سوزىنشە، ءبىلىم بەرۋ جۇيەسىنە جوعارى جاقتان ارنايى نۇسقاۋلار بەرىلىپ، مەكتەپتەردەگى تاربيە جۇمىسىنىڭ مازمۇنى دا وزگەرگەن.
