Nvidia ديرەكتورلار كەڭەسى كومپانيانىڭ باس ديرەكتورى دجەنسەن حۋانگتى قىزمەتىنەن شەتتەتۋدى قاراستىرىپ جاتىر. بۇل تۋرالى The Wall Street Journal باسىلىمى جازدى، دەپ حابارلايدى «ادىرنا» ءتىلشىسى.
شەشىمگە ونىڭ نەكەدەن تىس ەكى قارىم-قاتىناسى سەبەپ بولعان. ونىڭ ءبىرى كومپانيا قىزمەتكەرىمەن، ەكىنشىسى تىڭشىلىق جاسادى دەگەن كۇدىككە ىلىنگەن قىتاي ازاماتشاسىمەن بايلانىستى بولىپ وتىر.
8 قاراشادا دجەنسەن حۋانگ قىزمەتكەرلەرگە جولداعان حاتىندا ايەلىنە ادال بولماعانىن مويىنداعان. بۇعان دەيىن Nvidia باس ديرەكتورىنىڭ نەكەدەن تىس ەكى قارىم-قاتىناسى بولعانى تۋرالى اقپارات تاراعان.
العاشقى قارىم-قاتىناسى سينگاپۋرداعى Megaspeed دەرەكتەرمەن جۇمىس ىستەيتىن كومپانيانىڭ باسشىسى ەليس حۋانگپەن بايلانىستى بولعان. بۇل كومپانيا Nvidia-نىڭ ءىرى كليەنتتەرىنىڭ ءبىرى سانالادى. اقش بارلاۋ قىزمەتىنىڭ مالىمەتىنشە، Megaspeed قىتايدىڭ ارنايى قىزمەتتەرىنىڭ مۇددەسى ءۇشىن جۇمىس ىستەيدى.
بۇدان بولەك، Nvidia باس ديرەكتورىنىڭ كومپانيانىڭ دەنساۋلىق ساقتاۋ باعىتى بويىنشا ۆيتسە-پرەزيدەنتى كيمبەرلي پاۋەللمەن دە قارىم-قاتىناسى بولعانى ايتىلدى.
دجەنسەن حۋانگتىڭ قىزمەتىنەن كەتۋى كومپانيا تاريحىنداعى تۇتاس ءبىر ءداۋىردىڭ اياقتالۋىن ءبىلدىرۋى مۇمكىن. سەبەبى ءدال ونىڭ باسشىلىعى كەزىندە Nvidia جاساندى ينتەللەكت سالاسىنداعى جاھاندىق سەرپىلىستىڭ نەگىزگى قوزعاۋشى كۇشىنە اينالدى. ال حۋانگتىڭ ءوزى الەمدىك گەوساياساتتاعى ىقپالدى تۇلعالاردىڭ بىرىنە اينالدى. وسىلايشا، الەمدەگى ەڭ قىمبات كومپانيالاردىڭ ءبىرى باسشىسىز قالۋى مۇمكىن.
ازىرگە دجەنسەن حۋانگتىڭ ورنىنا كىم تاعايىندالاتىنى بەلگىسىز. WSJ ماتەريالى جاريالانعاننان كەيىن Nasdaq قور بيرجاسىندا Nvidia اكتسيالارىنىڭ قۇنى 8,6 پايىزعا تومەندەگەن.
23 قازاندا اقوردادا پرەزيدەنت قاسىم-جومارت توقاەۆ Nvidia باسشىسى دجەنسەن حۋانگتى قابىلداعان بولاتىن. كەزدەسۋ بارىسىندا كومپانيا جەتەكشىسى قازاقستاندى Physical AI, ياعني روبوتتاردى، اۆتونومدى كولىكتەردى جانە وندىرىستىك پروتسەستەردى باسقاراتىن فيزيكالىق جاساندى ينتەللەكت سالاسىنداعى الەمدىك حابقا اينالدىرۋدى ۇسىنعان.
پرەزيدەنت كاسىپكەرگە ەلدەگى جي ەكوجۇيەسىنىڭ دامۋىنا قوسقان ۇلەسى ءۇشىن العىس ايتىپ، ونى ءى دارەجەلى «دوستىق» وردەنىمەن ماراپاتتاعان.
