پرەمەر-مينيستر ولجاس بەكتەنوۆ باسقارعان ۇكىمەت تارايدى، دەپ حابارلايدى "ادىرنا" ۇلتتىق پورتالى.
ۇكىمەت باسشىسى 2024 جىلعى 6 اقپاندا پرەمەر-مينيستر قىزمەتىنە تاعايىندالعان. سودان بەرى ولجاس بەكتەنوۆتىڭ العاشقى مىندەتتەرىنىڭ قاتارىندا ەكونوميكانى جانداندىرۋ، بيۋدجەت قاراجاتىن ءتيىمدى پايدالانۋ، ينۆەستيتسيا تارتۋ جانە ينفراقۇرىلىم ماسەلەلەرىن شەشۋ بولدى. ونىڭ ۇكىمەتى جۇمىس ىستەگەن كەزەڭدە 2024 جىلى كوكتەمدەگى الاپات سۋ تاسقىنى بولدى. بىرنەشە وڭىردە توتەنشە جاعداي جاريالانىپ، مىڭداعان تۇرعىن ەۆاكۋاتسيالاندى. كەيىن زارداپ شەككەن ازاماتتارعا تۇرعىن ءۇي بەرۋ جانە وتەماقى تولەۋ جۇمىستارى جۇرگىزىلدى.
سول جىلدىڭ 6 قازانىندا قازاقستاندا اەس سالۋ ماسەلەسى بويىنشا رەسپۋبليكالىق رەفەرەندۋم ءوتتى. داۋىس بەرۋگە قاتىسقانداردىڭ 71,12%-ى اتوم ەلەكتر ستانتسياسىن سالۋدى قولدادى. وسىدان كەيىن اتوم ەنەرگەتيكاسى جوباسىن ىسكە اسىرۋ بويىنشا جۇمىستار جالعاستى.
ۇكىمەت جۇمىسىندا ماڭىزدى وزگەرىستەردىڭ ءبىرى جاڭا سالىق كودەكسىنىڭ قابىلدانۋى بولدى. قۇجاتقا 2025 جىلى 18 شىلدەدە قول قويىلىپ، 2026 جىلعى 1 قاڭتاردان باستاپ كۇشىنە ەندى. ونىڭ اياسىندا قوسىلعان قۇن سالىعىنىڭ بازالىق مولشەرلەمەسى 12%-دان 16%-عا دەيىن كوتەرىلىپ، جەكە تابىس سالىعىنىڭ پروگرەسسيۆتى شكالاسى ەنگىزىلدى.
سونىمەن قاتار، 2025 جىلى قازاقستان ەكونوميكاسى 6,5%-عا ءوستى. الايدا جىل قورىتىندىسىندا ينفلياتسيا 12,3%-دى قۇراپ، باعانىڭ ءوسۋى ۇكىمەت ءۇشىن نەگىزگى ماسەلەلەردىڭ بىرىنە اينالدى.
ولجاس بەكتەنوۆ ۇكىمەتىنىڭ جۇمىسى كەزەڭىندە 2026 جىلعى 15 ناۋرىزدا جاڭا كونستيتۋتسيا قابىلدانىپ، 1 شىلدەدەن باستاپ كۇشىنە ەندى. سونىڭ ناتيجەسىندە پارلامەنتتىڭ ورنىنا ءبىر پالاتالى قۇرىلتاي قۇرىلدى، سونداي-اق ۆيتسە-پرەزيدەنت ينستيتۋتى ەنگىزىلدى.
ال 23 تامىزدا جاڭا كونستيتۋتسياعا سايكەس قۇرىلتايدىڭ العاشقى سايلاۋى ءوتتى. 145 دەپۋتاتتان تۇراتىن جاڭا زاڭ شىعارۋشى ورگاننىڭ سايلاۋ قورىتىندىلارى 24 تامىزدا جاريالاندى.
ايتا كەتەيىك، ۇكىمەتتىڭ جۇمىسى توقتايتىنى تۋرالى پرەزيدەنت توقاەۆ 23 تامىز كۇنى سايلاۋدا داۋىس بەرگەننەن سوڭ جۋرناليستەرمەن وتكەن بريفينگتە ايتقان.
"دۇنيە جۇزىندەگى باسەكەلەستىك كۇشەيىپ كەلەدى. نارىقتىڭ سىن-قاتەرلەرىنە مۇقيات نازار اۋدارىپ، ەڭ باستىسى، ءتيىستى دەڭگەيدە توتەپ بەرۋىمىز كەرەك. البەتتە، ۇكىمەت وتستاۆكاعا كەتەدى. ۇكىمەت قۇرامىندا بىرقاتار وزگەرىس بولادى. اشىعىن ايتقاندا، ءدال بۇگىن ۇكىمەت جۇمىسىنا الاڭداۋعا نەمەسە وعان سىن ايتۋعا قانداي دا ءبىر نەگىز جوق. مينيسترلەر دە، ۇكىمەت جەتەكشىسى دە قولدان كەلگەنشە مىندەتتەرىن اتقارىپ جاتىر. بىراق كادرلىق وزگەرىستەر ءاردايىم بولادى. ويتكەنى بۇل ۇكىمەتتىڭ جۇمىسىنا قان جۇگىرتەدى", – دەدى مەملەكەت باسشىسى.
ايتۋىنشا، ماسەلە بىرەۋدى ورنىنان بوساتۋدا ەمەس.
"مەن جاي سىلتاۋمەن جۇمىستان شىعارۋعا قاشاندا قارسىمىن. اسىرەسە، قازىرگى تىلمەن ايتقاندا، مەدياداعى كونتەنت نەمەسە مازمۇن ءۇشىن اۋىس-ءتۇيىس جاساۋدىڭ قاجەتى جوق. كادرلىق شەشىم شىن مانىندە جۇمىسقا تىڭ سەرپىن بەرۋى كەرەك. ءبارىمىز ايتىپ جۇرگەن جاڭعىرۋ ۇدەرىسى ۇزدىكسىز جۇرگىزىلۋگە ءتيىس. ويتكەنى بۇل كۇردەلى پروتسەستى العا جەتەلەپ وتىرۋ قاجەت. بۇل ىستە ۇكىمەت ماڭىزدى ءرول اتقارادى", – دەگەن پرەزيدەنت قاسىم-جومارت توقاەۆ.
