10 قاراشادان باستاپ جەزقازعان قالاسىنىڭ باتىس اۋدانىنا تابيعي گاز كەزەڭ-كەزەڭىمەن بەرىلە باستادى. بۇل ماڭىزدى ينفراقۇرىلىمدىق جوبانىڭ جۇزەگە اسۋى – ەلدى مەكەندەردى گازداندىرۋ باعىتىنداعى جۇيەلى مەملەكەتتىك ساياساتتىڭ، ۇلىتاۋ وبلىسى اكىمىنىڭ قولداۋى مەن جاۋاپتى مەكەمەلەردىڭ بىرلەسكەن جۇمىسىنىڭ ناتيجەسى.
بۇگىن قالا اكىمى مۇرات بورىباەۆ پەن «QazaqGaz Aimaq» اق قاراعاندى وندىرىستىك فيليالىنىڭ باس ينجەنەرى ديلدابەك كۋلتيميروۆ تابيعي گازعا قوسىلعان تۇرعىن ۇيلەردىڭ بىرىنە بارىپ، ءۇي يەسىمەن كەزدەستى.
تۇرعىندار كوپتەن كۇتكەن تابيعي گازدىڭ ۇيلەرىنە جەتكىزىلگەنىنە قۋانىشتارىن ءبىلدىرىپ، جوبانى جۇزەگە اسىرۋعا اتسالىسقان ازاماتتارعا العىستارىن جەتكىزدى. ولاردىڭ ايتۋىنشا، تابيعي گازدىڭ قوسىلۋى كۇندەلىكتى تۇرمىستى ەداۋىر جەڭىلدەتىپ، جەكە تۇرعىن ۇيلەردەگى جايلىلىقتى ارتتىرادى.
گازداندىرۋ جوباسى اياسىندا نەگىزگى قۇرىلىس-مونتاج جۇمىستارى اياقتالىپ، 960 تۇرعىن ۇيگە گاز قوسۋعا ارنالعان شىعارۋ نۇكتەلەرى ورناتىلدى. اۋدانداعى 8 گاز تاراتۋ شكافىنىڭ 5-ەۋى ىسكە قوسىلدى. قالعان 3-ەۋىنە دە گاز بەرۋ جۇمىستارى كەزەڭ-كەزەڭىمەن جۇرگىزىلەدى.
قازىرگى ۋاقىتتا 80 ابونەنت تەحنيكالىق شارت الىپ، تۇرعىن ۇيلەرىن تابيعي گاز جەلىسىنە قوسۋعا دايىندىق جۇرگىزۋدە. وزگە تۇرعىندارعا دا قاجەتتى قۇجاتتاردى ۋاقىتىلى راسىمدەپ، بەلگىلەنگەن قاۋىپسىزدىك تالاپتارىن ساقتاي وتىرىپ، گازعا قوسىلۋ ۇسىنىلادى.
كەزدەسۋ بارىسىندا قالا اكىمى تۇرعىن ۇيلەردى گازبەن قامتاماسىز ەتۋ جۇمىستارىن جالعاستىرۋدىڭ ماڭىزىن اتاپ ءوتىپ، گاز جەلىسىنە قوسىلۋ كەزىندە بارلىق تەحنيكالىق نورمالار مەن قاۋىپسىزدىك تالاپتارىنىڭ قاتاڭ ساقتالۋى قاجەتتىگىنە نازار اۋداردى.
باتىس اۋدانىن گازداندىرۋ – تۇرعىنداردىڭ ءومىر ءسۇرۋ ساپاسىن ارتتىرۋعا جانە قالانىڭ ينجەنەرلىك ينفراقۇرىلىمىن دامىتۋعا باعىتتالعان ماڭىزدى جوبالاردىڭ ءبىرى. الداعى ۋاقىتتا تۇرعىن ۇيلەردى تابيعي گازعا قوسۋ جۇمىستارى كەزەڭ-كەزەڭىمەن جالعاسادى.
