بۇگىن ۇلىتاۋ وبلىسىندا ۇلتتىق ەكولوگيالىق باستاما – «تازا قازاقستان» اكتسياسى اياسىندا جاپپاي سەنبىلىكتەر ۇيىمداستىرىلدى. ءىس-شارانىڭ ماقساتى – تۇرعىنداردى قورشاعان ورتانى قورعاۋعا شاقىرۋ، ەكولوگيالىق مادەنيەتتى ارتتىرۋ جانە تۋعان ولكەگە قامقورلىق جاساۋدى داستۇرگە اينالدىرۋ.
اكتسيا وبلىستىڭ بارلىق قالالارى مەن اۋداندارىندا ءوتتى:
جەزقازعان قالاسىندا «تازا قالا» اكتسياسى جاستار، ەرىكتىلەر مەن قالا تۇرعىندارىنىڭ قاتىسۋىمەن الاشاحان داڭعىلى بويىندا ۇيىمداستىرىلىپ، ورتالىق كوشەلەرى تازالاندى.
ساتباەۆ قالاسىندا «ايالى جەر - تازا جەر» اتتى ءىس-شارا سپورتتىق-ساۋىقتىرۋ كەشەنىندە ءوتىپ، تۇرعىندارمەن قاتار قوعامدىق ۇيىم وكىلدەرى ەكولوگيالىق مادەنيەتتى ناسيحاتتادى.
قاراجال قالاسى مەن جايرەم كەنتىندە اقساقالدار كەڭەسى، ءماسليحات دەپۋتاتتارى مەن جاستاردىڭ بەلسەندى قاتىسۋىمەن ساياباقتار مەن دەمالىس ورىندارى تازارتىلدى.
جاڭاارقا اۋدانىندا «تازا اۋدان» اكتسياسى اياسىندا ورتالىق الاڭ مەن قوعامدىق ورىنداردا سەنبىلىك ءوتتى.
ۇلىتاۋ اۋدانىندا، ەمبۇلاق وڭىرىندە جاستار رەسۋرستىق ورتالىعى ۇيىمداستىرعان تازالىق شاراسىنا اۋىل تۇرعىندارى مەن بەلسەندى جاستار قاتىستى.
اكتسياعا مەملەكەتتىك ورگاندار وكىلدەرىمەن قاتار، بلوگەرلەر، قوعامدىق ۇيىم مۇشەلەرى، جاستار جانە ەرىكتىلەر قاتىستى. سونداي-اق، وبلىستىق جانە رەسپۋبليكالىق باق وكىلدەرى اقپاراتتىق قولداۋ كورسەتتى.
«تازا قازاقستان» رەسپۋبليكالىق اكتسياسى اياسىندا 2025 جىلدىڭ باسىنان بەرى 7 وبلىستىق جانە 8 قالالىق سەنبىلىك وتكىزىلدى. بۇعان قوسا، اپتا سايىن قالا مەن اۋدانداردا «تازا بەيسەنبى» شاراسى وتكىزىلىپ كەلەدى.
2025 جىلدىڭ باسىنان باستاپ «تازا قازاقستان» اكتسياسىنا 44 مىڭنان استام ادام قاتىستى. سونداي-اق 870 ارنايى تەحنيكا بىرلىگى جۇمىلدىرىلىپ، 3520 توننا قوقىس شىعارىلدى.
