10 qaraşadan bastap Jezqazǧan qalasynyŋ Batys audanyna tabiǧi gaz kezeŋ-kezeŋımen berıle bastady. Būl maŋyzdy infraqūrylymdyq jobanyŋ jüzege asuy – eldı mekenderdı gazdandyru baǧytyndaǧy jüielı memlekettık saiasattyŋ, Ūlytau oblysy äkımınıŋ qoldauy men jauapty mekemelerdıŋ bırlesken jūmysynyŋ nätijesı.
Bügın qala äkımı Mūrat Börıbaev pen «QazaqGaz Aimaq» AQ Qaraǧandy öndırıstık filialynyŋ bas injenerı Dildabek Kultimirov tabiǧi gazǧa qosylǧan tūrǧyn üilerdıŋ bırıne baryp, üi iesımen kezdestı.
Tūrǧyndar köpten kütken tabiǧi gazdyŋ üilerıne jetkızılgenıne quanyştaryn bıldırıp, jobany jüzege asyruǧa atsalysqan azamattarǧa alǧystaryn jetkızdı. Olardyŋ aituynşa, tabiǧi gazdyŋ qosyluy kündelıktı tūrmysty edäuır jeŋıldetıp, jeke tūrǧyn üilerdegı jailylyqty arttyrady.
Gazdandyru jobasy aiasynda negızgı qūrylys-montaj jūmystary aiaqtalyp, 960 tūrǧyn üige gaz qosuǧa arnalǧan şyǧaru nüktelerı ornatyldy. Audandaǧy 8 gaz taratu şkafynyŋ 5-euı ıske qosyldy. Qalǧan 3-euıne de gaz beru jūmystary kezeŋ-kezeŋımen jürgızıledı.
Qazırgı uaqytta 80 abonent tehnikalyq şart alyp, tūrǧyn üilerın tabiǧi gaz jelısıne qosuǧa daiyndyq jürgızude. Özge tūrǧyndarǧa da qajettı qūjattardy uaqytyly räsımdep, belgılengen qauıpsızdık talaptaryn saqtai otyryp, gazǧa qosylu ūsynylady.
Kezdesu barysynda qala äkımı tūrǧyn üilerdı gazben qamtamasyz etu jūmystaryn jalǧastyrudyŋ maŋyzyn atap ötıp, gaz jelısıne qosylu kezınde barlyq tehnikalyq normalar men qauıpsızdık talaptarynyŋ qataŋ saqtaluy qajettıgıne nazar audardy.
Batys audanyn gazdandyru – tūrǧyndardyŋ ömır süru sapasyn arttyruǧa jäne qalanyŋ injenerlık infraqūrylymyn damytuǧa baǧyttalǧan maŋyzdy jobalardyŋ bırı. Aldaǧy uaqytta tūrǧyn üilerdı tabiǧi gazǧa qosu jūmystary kezeŋ-kezeŋımen jalǧasady.
