ۇلىتاۋ وبلىسىنىڭ ەلتاڭباسى بەكىتىلدى. بۇل تۋرالى ۇلىتاۋ وبلىسىنىڭ اكىمدىگى مالىمدەدى، دەپ حابارلايدى “ادىرنا” ۇلتتىق پورتالى.
“بىرنەشە اي بويى ۇلىتاۋ وبلىسىنىڭ ەلتاڭباسىنىڭ ۇزدىك ەسكيزدىك جوباسىنا بايقاۋ وتكەنى بەلگىلى. ءوڭىردىڭ باستى رامىزىنە قاتىستى رەسپۋبليكامىزدىڭ تۇپكىر-تۇكپىرىنەن 130-عا جۋىق ۇسىنىس ءتۇستى.
بارلىق ەسكيزدەر 2022 جىلعى 12-18 جەلتوقسان ارالىعىندا ارنايى ۇيىمداستىرىلعان كورمە اياسىندا جەزقازعان تۇرعىندارى مەن قوناقتارىنىڭ نازارىنا ۇسىنىلدى. ناتيجەسىندە كوميسسيا مۇشەلەرى جانە كورمەگە كەلگەن تۇرعىندار ەڭ ۇزدىك 18 ەسكيزدى تاڭدادى”،- دەپ حابارلادى.
ۇلىتاۋ وبلىسىنىڭ ەلتاڭباسىن تاڭداۋعا ءوڭىردىڭ بارلىق تۇرعىندارى دا Instagram پاراقشاسىندا تانىمال «ەتو جەز» پاراقشاسىندا داۋىس بەرۋ ارقىلى قاتىسۋعا مۇمكىندىك الدى. ونلاين داۋىس بەرۋ ناتيجەلەرى بويىنشا ەڭ كوپ داۋىس جيناعان №15 نۇسقا بولىپ ايقىندالدى.
“جەڭىمپاز اتانعان ەسكيزدىك جوبا جەرلەسىمىز، ەۋرازيالىق ديزاينەرلەر وداعىنىڭ مۇشەسى شاحيبادەن سەيىتكەنوۆتىڭ ەڭبەگىنىڭ ناتيجەسى. ۇلىتاۋ وبلىسىنىڭ ەلتاڭباسى - تاۋلاردىڭ ءبىر ءتۇستى كونتۋرلىق بەينەسى. ەلتاڭبانىڭ تومەنگى بولىگىندە - “ŪLYTAU”دەگەن جازۋ بار.
ءتۇرلى-ءتۇستى بەينەدە ۇلىتاۋ وبلىسىنىڭ ەلتاڭباسى ەكى ءتۇستى: قوڭىر جانە كوك. ەلتاڭباداعى ورتالىق ورىندى ۇلىتاۋ تاۋلارىن ەسكە تۇسىرەتىن سۋرەت الادى. الايدا، تاۋلاردىڭ بەينەسى تەك رەلەفتى جاڭعىرتۋ عانا ەمەس، بۇل ۇلكەن كوركەمدىك-ەستەتيكالىق وبراز; بوستاندىقتىڭ سيمۆولى، بولاشاققا اپاراتىن جول، رۋحاني ورلەۋدىڭ سيمۆولى.
تومەنگى جاعىندا ورنالاسقان “ŪLYTAU” جازۋى تاڭبالى تاس پەتروگليفتەرى ستيلىندە بەينەلەنگەن. بۇل ءوز كەزەگىندە، ءبىزدىڭ ولكەمىزدىڭ باي تاريحىن، حالىقتىڭ بىرلىگى مەن تۇتاستىعىنىڭ عاسىرلار بويعى داستۇرلەرىن بەينەلەيدى. عالىمدار تاڭبالى تاستى قازاق حالقىنىڭ العاشقى كونستيتۋتسياسى دەپ اتاعانى كەزدەيسوق ەمەس: مۇندا رۋ وكىلدەرى تاستارعا پەتروگليفتەر ويىپ، ماڭگىلىك باۋىرلاستىقتا بولۋعا انت بەرگەن. وسىلايشا، تۇرعىندار تاڭداعان ۇلىتاۋ وبلىسىنىڭ ەلتاڭباسى ءوڭىرىمىزدىڭ اجىراماس وتكەنىن، بۇگىنىن جانە بولاشاعىن بايلانىستىرادى”،- دەپ جازدى اكىمدىك جەلىدەگى پاراقشاسىنا.
بۇدان بىلاي بۇل ەلتاڭبا ۇلىتاۋ وبلىسىنىڭ ايرىقشا بەلگىلەرىنىڭ ءبىرى بولادى. ەلتاڭبانىڭ ەتالونىن ارنايى كوميسسيا بەكىتتى، ونىڭ قۇرامىنا ايماقتاعى تانىمال عالىمدار مەن سۋرەتشىلەر، تاريحشىلار مەن پەداگوگتار، قۇرمەتتى ارداگەرلەر مەن قوعام قايراتكەرلەرى ەندى. كوميسسيانىڭ توراعاسى قازاقستاندىق سۋرەتشى جانە ساۋلەتشى، قر مەملەكەتتىك ەلتاڭباسى اۆتورى ج.مالىبەكوۆ بولدى.
