ۇلتتىق بىرىڭعاي تەستىلەۋ مەن مۇعالىمدەردىڭ ءبىلىمىن باعالاۋدى وتكىزۋگە جاۋاپتى ۇيىمنىڭ جەكەلەگەن قىزمەتكەرلەرى قۇرىقتالدى، دەپ حابارلايدى “ادىرنا” ءتىلشىسى.
ۇلتتىق قاۋىپسىزدىك كوميتەتىنىڭ شىعىس قازاقستان جانە قىزىلوردا وبلىستارى بويىنشا دەپارتامەنتتەرى پروكۋراتۋرامەن بىرلەسىپ، اتالعان وڭىرلەردەگى ۇلتتىق بىرىڭعاي تەستىلەۋدى جانە مۇعالىمدەردىڭ ءبىلىمىن باعالاۋدى وتكىزۋگە جاۋاپتى ۇيىمدا زاڭسىز ارەكەتتەرگە بارعان قىزمەتكەرلەردىڭ جولىن كەسكەن.
كوميتەت ءباسپاسوز قىزمەتىنىڭ مالىمەتىنشە، كۇدىكتىلەر سەرۆەرلىك جابدىققا جانە باسقا دا اقپاراتتىق رەسۋرستارعا قول جەتكىزە وتىرىپ، ارنايى باعدارلامالار ارقىلى تەست بارىسىندا كومپيۋتەرلەرگە قاشىقتان قوسىلىپ، تەست تاپسىرۋشىلاردان اقشالاي سىياقى الۋ ءۇشىن جوعارى تەست ناتيجەلەرىن الۋعا كومەكتەسىپ كەلگەن.
«2023 جىلدىڭ 19 شىلدەسىندە 3 نەگىزگى ايىپتالۋشى ۇستالىپ وتىر. ولاردى ءتىنتۋ كەزىندە قاشىقتان قوسىلۋدى قامتاماسىز ەتەتىن تەحنيكالىق قۇرىلعىلار مەن باعدارلامالار، اقشالاي قاراجات جانە باسقا دا زاتتاي ايعاقتار تابىلىپ، تاركىلەندى»، - دەلىنگەن رەسمي حابارلامادا.
قر قىلمىستىق كودەكسىنىڭ 207-بابى «اقپاراتتىق جۇيەنىڭ نەمەسە تەلەكوممۋنيكاتسيا جەلىلەرىنىڭ جۇمىسىن بۇزۋ» جانە 210-بابى «زياندى كومپيۋتەرلىك باعدارلامالار مەن باعدارلامالىق ونىمدەردى جاساۋ، پايدالانۋ نەمەسە تاراتۋ» بويىنشا سوتقا دەيىنگى تەرگەۋ امالدارى جۇرگىزىلۋدە.
